Tauwai 12:1-8

¹Sauginemo ma valivaliumi Taupatimi nuwemi ima kauleya. Ma valivaliumi ko vivile kauwa bi pilipili laḡandimo ba ko giuna gado, “Yawasanidi mote kaka yàmai nuwavisu munaḡedi.”

²Suwala, nawalai bi kipola yanedi sai dudubala bi nabu ya vakamaḡe, mulinemo kaka yada ya laumaḡata gabunemo.

³Kwa noḡoti te nima tausagum sa gusugusu bi kaḡem em ani vamakamakai a mwalulu. Bi mwakam kamya anisana guda kauwena ba a kuluva bi matam ai gaḡugaḡu te mote kumai kita kauwa.

⁴Sauginemo beyam i potana ba etamo dagugu mote kuma vaiye. Bamo te witi sa ḡaviḡavi guda bi daguguna ya saḡasaḡa ee sale sai beya takataka bi mote luvana kuma vaiyedi. Bi mwanuwa kalinedimo kwa kena nuwasa.

⁵Taupatim kwa gei noḡoti muliḡa kaka kwai magula kauwa. Mba saugidimo kwa lauvayado bi kaidakiḡa nawa kwa naile. Dabam ya yaguna bi tubuḡa wai ḡemotina noḡotina lisimmo ya kovi. Tam kaka gabu kenakena nonoḡinemo kwa nawa kwai yawasi bi em pekimo tauḡaba sa ḡabem.

⁶Ma valivalium Taupatim kwa noḡoti, muliḡa kaka em yawasana visuvisuna maibena sein kipokipolina ya nuwaḡavuka, ee gulewa goldimo voivoiyena ya nuwagolu, ee mai gauba dugina ya nuwanuwagoluna.

⁷Te tubuḡa ya munaḡa yaila gobusa bi aluwa Maimaituwa i vitevitedana ya vai munaḡe.

⁸Tauwailovelove i giuna gado, “Yawasana banina geḡa, giukauwa te bai matabudi banidi geḡa.”