Text copied!
CopyCompare
Kâte Bible - Taha Bapare Sâcmutâc - Taha Bapare Sâcmutâc 8

Taha Bapare Sâcmutâc 8:2-33

Help us?
Click on verse(s) to share them!
2“Aroŋ â ŋokâfâcne rocjopazemec, erâ ŋaqi qoruc, wokemaŋ opâ, sâqocne tâtâmire tahare bulimakao, lama ŋicne jajahec erâ poroŋ goreŋ tâmiric kâdohec i mâmâc rofârezemec.
3Rofârerâ kikefuŋ ʒeŋgoma tutumaŋ qoruc bozere motâcko hetumaŋ‐jopazemec.”
4Eme Mose e Wofuŋzi âzâcne mutâc ewec irec sâc efârewec, ehame kikefuŋ jaŋe tutumaŋ qoruc bozere motâcko tumaŋnembiŋ.
5Ehame Mose e kikefuŋ ʒiŋuc jazawec: “Wofuŋzi wiac kecʒiŋuc enaŋte mutâcne‐nârewec.”
6Mose e iŋuc jazarâ Aroŋ â ŋokâfâcne ejareme warepie opâ rua‐jarewec.
7Rua‐jareme tarame Aroŋ ŋaqi maŋne hecneme hume umbikazi basanaŋkecnewec. Izi ŋaqi sahacne â qoqonaŋ ŋaqi hecneme hume qoqonaŋ ŋaqire masecne mizekicne izi hafecnewec.
8Iŋuc erâ qâ amecnao qonaŋkecnerâ amecnao dâŋ mumutarare ma jajahec Urim â Tumim i hâcne râecnewec.
9Erâ Wofuŋzi Mose mutâcnecnewec irec sâcko qizecnao du kakambuc moc hecneme huwec â masapu golzi bakicne, eri hendiŋ tirine hâcne, i ira bohotacneme mamai fowec.
10Eme Mose e rurua wokemaŋ opâ rorâ tiri boze â maŋnao wiac fofârewec i ruacnehuc bâtiriwec.
11Erâ wokemaŋ gâcne alatao tieme arec 7 ewec. Ehuc alata â giere wiac‐ticne sasawa erâ opâ pake sâko ŋeŋenehec i bâtirieocte wokemaŋ ruacnewec wâc.
12Wokemaŋ gâcne ine Aroŋ mufirieocte qizecnao hoŋkehuc ruacnewec.
13Mose e iŋuc erâ Wofuŋzi mutâcnecnewec irec sâc ehuc Aroŋ ŋokâfâcne ejareme warepie ŋaqi hejareme hume umbika joma‐jarerâ du hejareme huwec.
14I tarame sâqocne tâtâmire tahare bulimakao ŋicne mume bafisipie Aroŋ â ŋokâfâcne jaŋe mejeŋiczi qizecne basanaŋkembiŋ.
15Iŋuc ehuc bânduŋkepie Mosezi qâhâmowec. Ehuc socticne rorâ meticnezi alata ʒuŋene râreckehuc ruacnewec, iŋuc ehuc ʒure ɋaɋackewec. Soc gâcne ine alata fuŋnao hoŋkewec. E alatare due baocte iŋuc ehuc bâtiriwec.
16Iŋuc erâ Mose e wokemaŋ qârurune â bugâpâcnao qârurune fokac erâ râpe hândâŋ jahecnao wokemaŋzi bohotara fokac i rorâ alatao râeme ʒawec.
17Bulimakao fârine â sahacne â biucne erâ hone i ine Wofuŋzi Mose mutâcnecnewec irec sâcko hae râpenao ʒocko râeme ʒafârewec.
18Eme Mosezi mume qowi bâzi ririkere lama ŋicne bafisipie Aroŋ â ŋokâfâcne jaŋe qizecne bânduŋkembiŋ.
19Ehame Mose e qâhâmorâ socticne alata râreckehuc tie rawec.
20Izi lama ŋicne hezupie tarame Mosezi qizecne â dâkâne dâkâne erâ wokemaŋne râeme ʒawec.
21Erâ hobune â kikene opâzi ʒureme tarame wiac i sasawa iŋuc jaha alatao rome ferâ ʒawec. I Wofuŋzi Mose mutâcnecnewec irec sâcko hâcne qowi bâzi râeme ʒahuc Wofuŋte maio âsu biaŋ fuawec.
22Eme Mose e lama ŋicne moc, mumufiriere lama hâcne, i mume bafisipie Aroŋ â ŋokâfâcne jaŋe mejeŋiczi qizecne bânduŋkembiŋ.
23Ehame Mosezi qâhâmorâ soc gâcne rorâ Aroŋ hazecɋoŋ‐ticne fâreopec â meneŋgoc‐ticne fâreopec erâ kike neŋgoc‐ticne fâreopec jaha ruacnewec.
24I tarame Aroŋ ŋokâfâcne jowac‐jopa warepie Mosezi hazecɋoŋ‐jeŋic fâreopec â meneŋgoc‐jeŋic fâreopec â kike neŋgoc‐jeŋic fâreopec jaha i soc rua‐jarewec; soc gâcne ine alata râreckehuc tie rawec.
25Iŋuc erâ wiac kecʒiŋuc rofârewec: Wokemaŋ â gecne wokemaŋhec â honao wokemaŋ bohotarâ fowec â bugâpâcnao qârurune fowec â râpe hândâŋ jajahec â ira wokemaŋzi bohotara fowec erâ ŋefacne fâreopec.
26Erâ Wofuŋte maio nânâ poroŋ kâdoc ŋewec irecnec poroŋ goreŋ tâmiric moc â poroŋ wokemaŋhec rikekicne moc erâ poroŋ rike dapirekicne i mâmâc rorâ wokemaŋ â ŋefacne fâreopec irec faio râewec.
27Ehuc wiac i sasawa Aroŋ â ŋokâfâcne jaŋere meo râerâ ejareme Wofuŋte maio fenʒoŋkembiŋ.
28Eme Mose e mocwâc mejeŋickonec rorâ alata faio qowi bâzihec mâmâc mumufirie taha eha rike siŋsiŋkeme Wofuŋte maio âsu biaŋ fuawec.
29Ehame Mose e amec siecne rorâ Wofuŋte maio fenʒoŋkewec wâc. Wofuŋzi Mose mutâcnecnewec irec sâc mumufiriere amec siecne i Mosere biŋe ewec hâcne.
30Eme Mose e rurua wokemaŋ gâcne â alatao soc fowec irecnec wâc gâcne rorâ Aroŋ jahacne â ŋaqi‐ticne erâ wâc ŋokâfâcne erâ ŋaqi‐jeŋic rua‐jarewec. Iŋuc ehuc Aroŋ e jahacne â ŋokâfâcne mâmâc ŋaqi‐jeŋichec bâtiric‐jopawec.
31Erâ Mose e Aroŋ â ŋokâfâcne ʒiŋuc jazawec: “Ŋoŋe tutumaŋ qoruc bozere motâcko qowi biuc rikerâ poroŋ mumufirie kâdocko fokac ihec mâmâc nânʒepieŋ. No irec hâcne ʒiŋuc mutâcne‐ŋarepo: ‘Aroŋ go â ŋokâfâcge ŋoŋe nânʒepieŋ.’
32Erâ qowi â poroŋ irec tiwâne fome ʒocko rikenʒepieŋ.
33Ŋoŋe ʒoaŋ gie bapa 7 tutumaŋ qoruc boze moc mi bebehe ijaha ŋehuc juhapie mumufirie dameŋ‐ŋeŋic tarazejec; nâŋe mufiriec‐ŋopahuc juhapene ʒoaŋ 7 taraocmu hâcne.

Read Taha Bapare Sâcmutâc 8Taha Bapare Sâcmutâc 8
Compare Taha Bapare Sâcmutâc 8:2-33Taha Bapare Sâcmutâc 8:2-33