Taha Bapare Sâcmutâc 8:17-36

¹⁷Bulimakao fârine â sahacne â biucne erâ hone i ine Wofuŋzi Mose mutâcnecnewec irec sâcko hae râpenao ʒocko râeme ʒafârewec.

¹⁸Eme Mosezi mume qowi bâzi ririkere lama ŋicne bafisipie Aroŋ â ŋokâfâcne jaŋe qizecne bânduŋkembiŋ.

¹⁹Ehame Mose e qâhâmorâ socticne alata râreckehuc tie rawec.

²⁰Izi lama ŋicne hezupie tarame Mosezi qizecne â dâkâne dâkâne erâ wokemaŋne râeme ʒawec.

²¹Erâ hobune â kikene opâzi ʒureme tarame wiac i sasawa iŋuc jaha alatao rome ferâ ʒawec. I Wofuŋzi Mose mutâcnecnewec irec sâcko hâcne qowi bâzi râeme ʒahuc Wofuŋte maio âsu biaŋ fuawec.

²²Eme Mose e lama ŋicne moc, mumufiriere lama hâcne, i mume bafisipie Aroŋ â ŋokâfâcne jaŋe mejeŋiczi qizecne bânduŋkembiŋ.

²³Ehame Mosezi qâhâmorâ soc gâcne rorâ Aroŋ hazecɋoŋ‐ticne fâreopec â meneŋgoc‐ticne fâreopec erâ kike neŋgoc‐ticne fâreopec jaha ruacnewec.

²⁴I tarame Aroŋ ŋokâfâcne jowac‐jopa warepie Mosezi hazecɋoŋ‐jeŋic fâreopec â meneŋgoc‐jeŋic fâreopec â kike neŋgoc‐jeŋic fâreopec jaha i soc rua‐jarewec; soc gâcne ine alata râreckehuc tie rawec.

²⁵Iŋuc erâ wiac kecʒiŋuc rofârewec: Wokemaŋ â gecne wokemaŋhec â honao wokemaŋ bohotarâ fowec â bugâpâcnao qârurune fowec â râpe hândâŋ jajahec â ira wokemaŋzi bohotara fowec erâ ŋefacne fâreopec.

²⁶Erâ Wofuŋte maio nânâ poroŋ kâdoc ŋewec irecnec poroŋ goreŋ tâmiric moc â poroŋ wokemaŋhec rikekicne moc erâ poroŋ rike dapirekicne i mâmâc rorâ wokemaŋ â ŋefacne fâreopec irec faio râewec.

²⁷Ehuc wiac i sasawa Aroŋ â ŋokâfâcne jaŋere meo râerâ ejareme Wofuŋte maio fenʒoŋkembiŋ.

²⁸Eme Mose e mocwâc mejeŋickonec rorâ alata faio qowi bâzihec mâmâc mumufirie taha eha rike siŋsiŋkeme Wofuŋte maio âsu biaŋ fuawec.

²⁹Ehame Mose e amec siecne rorâ Wofuŋte maio fenʒoŋkewec wâc. Wofuŋzi Mose mutâcnecnewec irec sâc mumufiriere amec siecne i Mosere biŋe ewec hâcne.

³⁰Eme Mose e rurua wokemaŋ gâcne â alatao soc fowec irecnec wâc gâcne rorâ Aroŋ jahacne â ŋaqi‐ticne erâ wâc ŋokâfâcne erâ ŋaqi‐jeŋic rua‐jarewec. Iŋuc ehuc Aroŋ e jahacne â ŋokâfâcne mâmâc ŋaqi‐jeŋichec bâtiric‐jopawec.

³¹Erâ Mose e Aroŋ â ŋokâfâcne ʒiŋuc jazawec: “Ŋoŋe tutumaŋ qoruc bozere motâcko qowi biuc rikerâ poroŋ mumufirie kâdocko fokac ihec mâmâc nânʒepieŋ. No irec hâcne ʒiŋuc mutâcne‐ŋarepo: ‘Aroŋ go â ŋokâfâcge ŋoŋe nânʒepieŋ.’

³²Erâ qowi â poroŋ irec tiwâne fome ʒocko rikenʒepieŋ.

³³Ŋoŋe ʒoaŋ gie bapa 7 tutumaŋ qoruc boze moc mi bebehe ijaha ŋehuc juhapie mumufirie dameŋ‐ŋeŋic tarazejec; nâŋe mufiriec‐ŋopahuc juhapene ʒoaŋ 7 taraocmu hâcne.

³⁴Miŋecgac wiac ekicne i kiwiric‐ŋeŋic rozore Wofuŋte micte ekicne.

³⁵Ŋoŋe hâmonʒipiŋte Wofuŋzi mutâcnewec irec sâcko wiac ebac ehuc tutumaŋ qoruc bozere motâcko ŋafe ʒoaŋ ŋehuc juhapie ʒoaŋ 7 tarazejec; dâŋ iŋuc hâcne ŋazapemurâ mutâcne‐narekicne.”

³⁶Eme Aroŋ â ŋokâfâcne jaŋe Wofuŋzi Mose dâŋ mutâcnecnewec i jazame reŋke‐fârembiŋ.