Taha Bapare Sâcmutâc 7:4-30

⁴Ehuc râpe hândâŋ jajahecko wokemaŋzi bohotarâ fokac erâ bugâpâcnao qârurune fokac i râpe hândâŋhec mâmâc bârâriezo.

⁵Taha bapa eki hâcne wiac i Wofuŋte biŋe qahuc alata faio rikezejec; wiac i kiŋ tatarare taha hâcne.

⁶Taha bapa ŋic jaŋe irecnec wiac gâcne nâzo murâ sâcne nâniŋmu, wiac i tirine jâmbâŋ ekacte nâzo murâ tirific maŋko nânʒepieŋ.

⁷Kiŋ tatara i sâqocne tâtâmire tahare sâc jaha, irec jahe sâcmutâc‐jekic mocjaha. Wiac i taha bapa kiŋ tatara taha râehuc kiwiric roocmu ere biŋe ezejec.

⁸Me taha bapa moc e ŋic i me i ere qowi bâzi rikeocmu e qowi bâzi rikewec irec sahacne rozejec.

⁹Me taha bâzi ofeŋmaŋko me ʒocrâqâcko me ofeŋ fainao rikekicne i taha bapazi taha râeocmu ere biŋe ezejec.

¹⁰Â taha bâzi wokemaŋhec bâsifuckekicne me kereŋne i sasawa Aroŋ ŋokâfâcne jaŋere biŋe eme sâckoa bâtâc banʒepieŋ.

¹¹“Wama bâzi gâcne gâcne Wofuŋte biŋe qahuc rikeniŋmu irec sâcmutâc i kecʒiŋuc:

¹²Ŋic moc e wama bâzi daŋge tahare biŋe râezo murâ ine nânâ poroŋ goreŋ tâmiric wokemaŋhec bâsifuckekicne â poroŋ wokemaŋ ruacnekicne erâ poroŋ uucne wokemaŋhec bâsifucke‐hâmokicne i mâmâc râezejec.

¹³Wama bâzi‐ticne daŋge tahare biŋe râehuc nânâ poroŋ goreŋnehec mâmâc râezejec.

¹⁴Erâ e taha râeocmu sâc poroŋ irec dâkâne moc rorâ Wofuŋte biŋe qazejec; izi ʒâhec ine taha bapazi wama bâzire soc tieekac ere biŋe ezejec.

¹⁵Daŋge tahare biŋe wama bâzi qowi irec biucne rikeniŋmu ʒoaŋ ijaha nâfârenʒepieŋ, tiwâne moc behepie foha hae mi furezejec.

¹⁶Me ŋic moczi mumupaŋ muwecte erâ taha râeocmu me buafec‐ticnere râeocmuo ine râeocmu ʒoaŋ ijaha nânʒepieŋ, tiwâne foocmuo ine hae fureme nâfârenʒepieŋ.

¹⁷Me qowi tucne tofane moc foocmuo ine ʒoaŋ namba 3 ira ʒocko râepie ʒafârezejec.

¹⁸Me wama bâzi qowi irec biucne gâcne ʒoaŋ namba 3 ira moc nâniŋmuo ine Wofuŋzi ŋic taha râewec e jahacne â taha‐ticnere maname mi biaŋkeocmu. Taha iŋucnere manapie wiac mamakâcne ezejec, ehame moc e nâ bac eocmuzi kiŋ nâfuaocmu.

¹⁹“Qowi biucnezi wiac mamakâcne he heuac eocmu ine mi nânʒepieŋ, i ʒocko râepie ʒazejec. Ŋic ɋaɋacne juŋgopieŋzi qowi gâcne nâzo murâ nânʒepieŋ.

²⁰Mâc ŋic moc e wâwânâŋhec juhuc wama bâzi Wofuŋte biŋe mukicne irec qowi nâocmu e mi juzejec.

²¹Me ŋic moczi ŋic me qowi wâwânâŋhec me wiac wâwânâŋne ba bâuac erâ wama bâzi Wofuŋte biŋe mukicne irec qowi nâocmu e wâc mi juzejec.”

²²Wofuŋzi Mose ʒiŋuc âzâcnewec:

²³“Go Israe ŋic ʒiŋuc jazac: Ŋoŋe bulimakao me lama me noniŋ irec wokemaŋ moc mi nânʒepieŋ.

²⁴Qowi e jahac hâmoekac me qowi mimicne gâcne jaŋe kisuc qâsuckeeŋgopieŋ irec wokemaŋ i wiac irec me irec rozo murâ ronʒepieŋ, nânâ ine moc mi nânʒepieŋ.

²⁵Me ŋic moc e Wofuŋte biŋe bâzi rikeniŋmu irec wokemaŋ nâocmu e mi juzejec.

²⁶Erâ i sawa mâcne, ŋoŋe ira me ira juhuc qâqâc me qowi soc moc mi nânʒepieŋ.

²⁷Moc e soc i nâocmu e mi juzejec.”

²⁸Wofuŋzi Mose ʒiŋuc âzâcnewec:

²⁹“Go Israe ŋic ʒiŋuc jazac: Moc e wama bâzi‐ticne Wofuŋtao râeocmu e irec tofane Wofuŋte biŋe qazejec.

³⁰Ehuc Wofuŋte biŋe alatao rikeeŋgopieŋ i e jahac bafisizejec. Wokemaŋ â qowi amec siecne hâcne bafisizejec, eme amec siecne i Wofuŋte maio fenʒoŋkehuc taha râenʒepieŋ.