Taha Bapare Sâcmutâc 27:7-27

⁷Me ŋic ŋokac jara dameŋ‐jeŋic 60 me jara 60 jâururâ feocmuo ine ŋicte okacne siliwa moneŋ 15 â ŋokacte okacne moneŋ 10 râezo.

⁸Me ŋic e hapetac juhuc moneŋ mukicne i râezo eipieocmuo ine taha baparao jowa rapie eki ŋic fuŋne‐ticne mana tarazejec. Ehuc ŋic e moneŋ wezimuc sâcne râeocmu i mana tarahuc irec sâc râeocte mucnezejec.

⁹“Me qowi Wofuŋ taha rikecneeŋgopieŋ qowi iŋucne moc Wofuŋte biŋe qambiŋko ine manapie tirine ezejec.

¹⁰Ŋic moc e qowi iŋucne mocwâc bârârierâ âkehoc‐ticne moc rârâe i mi ezejec, e qowi biaŋnere okacne sâqocne mi râezejec â qowi sâqocnere okacne biaŋne wâc mi râezejec. Me sifu âkehoc‐ticne râezo mume ine qowi mârâc râekicne â âkehoc‐ticne ʒâhec râekicne jahe mâmâc jaha Wofuŋte biŋe ezepirec.

¹¹Me ŋic moczi qowi wâwânâŋhec Wofuŋ mi rikecneeŋgopieŋ iŋucne moc râezo murâ ine qanaŋ taha baparao barazejec.

¹²Eme taha bapa eki, qowi biaŋne me sâqocne irec dâŋ mutarame manapie sâckezejec.

¹³Me ŋic e qowire okacne moneŋ râezo murâ ine furine mukicne irec sâc erâ 5‐konec wâŋ ʒuhuckerâ râezejec.

¹⁴“Me ŋic moc e ficticne Wofuŋte biŋe qaocmuo ine taha bapazi fic i biaŋne me sâqocne irec fuŋne hone manac ehuc furine muzejec, eme dâŋ muocmu irec manapie sâckezejec.

¹⁵Me ŋic e ficticne Wofuŋte biŋe qawec i mocwâc e jahacne biŋe eocte manasurâ ine furine mukicne irec sâc erâ 5‐konec wâŋ ʒuhuckerâ râeme e jahacne biŋe ezejec.

¹⁶“Ŋic moc e mamac ŋosafâc‐ticne jaŋere merâfâc mâreŋ bajukac irec dâkâne moc Wofuŋte biŋe qaocmuo ine mâreŋ ira wiac ukicne pake wezimuc râeniŋmu izi furire sâc mufuazejec, padi ukicne pake wâŋ irec furine siliwa moneŋ 50 ezejec.

¹⁷Ŋic e mâreŋ‐ticne sabata jara hombaŋko Wofuŋte biŋe qaocmuo ine furine mukicne i furu jaha rozejec.

¹⁸Me ŋic e mâreŋ‐ticne sabata jara hombaŋ faicnao sawa Wofuŋte biŋe qaocmuo ine irecnec fuŋkerâ wose rakupie sabata jara hombaŋ moc maickeocmu dameŋ ŋondeŋ ira jara wezimuc foocmu irec sâc manahuc furine bawahanʒepieŋ.

¹⁹Me mâreŋ‐ticne Wofuŋte biŋe qaocmu i mocwâc furine bazo murâ ine mâreŋte furi mukicne irec sâc erâ 5‐konec wâŋ ʒuhuckerâ râeme e jahacne biŋe fozejec.

²⁰Me mocwâc furine bazo mi ecneocmuo me moneŋte erâ ŋic moc mutaracneocmuo ine furi bapare sâc mocwâc mi eocmu.

²¹Aricne, mâreŋ i sabata jara hombaŋko behepie Wofuŋte biŋe tirine eha taha bapazi rauckezejec.

²²Me ŋic moc e merâfâc mâreŋ mâcne, mâreŋ furune moc furine bakicne i Wofuŋte biŋe qaocmuo

²³ine taha bapazi mâreŋ Wofuŋte biŋe qakicne dameŋ ira fuŋkerâ wose rakume sabata jara hombaŋ maickeha jara wezimuc eocmu irec sâc ʒoaŋ ijaha furine râeme Wofuŋte taha tirine ezejec.

²⁴Sabata jara hombaŋko ira ine mâreŋ i mocwâc mârâc rune ere biŋe ezejec, mamac ŋosafâc‐ticne jaŋere meonec rorâ bajuwec erao hâcne risiezejec.

²⁵Furine sasawa ine furufic moneŋte hawari fokac irec sâc efârezejec. Gera moneŋ 20 izi siliwa moneŋ wâŋ irec sâc ezejec.

²⁶“Qowi mârâc fufua i biac Wofuŋte biŋe ekacte ŋiczi Wofuŋte biŋe mocwâc mi qanʒepieŋ; bulimakao me lama, qowi iŋucne i Wofuŋte biŋe mukicne hâcne.

²⁷Me qowi iŋucnezi sahac fâsâc mi fuawecko ine runezi furine mukicne irec sâc erâ 5‐konec wâŋ ʒuhuckerâ râeme e jahacne biŋe ezejec. Me eki furine mi baocmuo ine ŋic moczi furine mukicne irec sâc sawa râeme ere ezejec.