Text copied!
CopyCompare
Kâte Bible - Taha Bapare Sâcmutâc - Taha Bapare Sâcmutâc 26

Taha Bapare Sâcmutâc 26:16-36

Help us?
Click on verse(s) to share them!
16ine wiac ʒiŋuc eŋarepemu: No mupe wiac hâhâwicnezi ututuŋ fua‐ŋareocmu, ehame hucsanaŋ â huc ʒocnehec fua‐ŋareme ʒâŋe ʒoʒora â sahac wawaha eniŋmu. Iŋuc ehuc nânâ wiac he sarac eipiehapie fârine fuame râsifâc‐ŋeŋic jaŋe nâ bac eniŋmu.
17No râsi eŋarehape râsifâc‐ŋeŋic jaŋe jâpec‐ŋopanʒepieŋ, â qaisoc‐ŋopaeŋgopieŋ jaŋe bomboŋ eŋarenʒepieŋ, ehame moczi moc ŋopa jâpec mi eŋareha wisenʒepieŋ.
18Iŋuc fua‐ŋareme sifu dâŋnane mana rereŋ mi eniŋmuo ine sâqocne‐ŋeŋicte erâ bâtiŋ‐ŋopape arec 7 ezejec.
19Ehame no pepec penaroŋ‐ŋeŋic bawahahuc sawa qânikiŋ mupe aeŋ iŋucne erâ sanaŋkerâ fozejec â mâreŋ‐ŋeŋic i aeŋ bâbâroŋ iŋucne erâ fozejec.
20Iŋuc fuame ŋoŋe tâpiri‐ŋeŋic mâc qâmienʒepieŋ, erâ mâreŋ‐ŋeŋiczi nânâ wiac gume hesiwiŋ mi ezejec â gieo jâc wiac doma rakac izi hândâŋ fârihec mi ezejec.
21“Ŋoŋe dâŋnane qatarahuc micnane mi reŋkeniŋmuo ine mupe wiac hâhâwicne mocwâc fua‐ŋareocmu, sâqocne‐ŋeŋicte erâ mupe wiac hâhâwicne arec 7 fua‐ŋarezejec.
22Erâ no qowi mimicne ejarepe ŋondeŋ‐ŋeŋicko fuarâ naru motecfâc‐ŋeŋic kisuc qâsuc‐jopahuc bulimakaofâc‐ŋeŋic wâc sipiric‐jopapie ʒare‐jeŋic wahazejec; iŋuc eŋarepie hae mâreŋ‐ŋeŋic niniŋ siarereŋ fuarâ fozejec.
23“Bâbâtiŋ iŋuc fua‐ŋareme sifu norao risiehuc dâŋnane mi mananiŋmuo
24ine noni iŋuc jaha dâŋŋeŋic mi manahuc sâqocne‐ŋeŋicte erâ bâtiŋ‐ŋopape arec 7 eocmu.
25Erâ mupe ʒikazi fai‐ŋeŋicko ferâ ʒâʒâfic hetâcnembiŋ irec okacne bazu‐ŋarezejec, ehame ŋoŋe hae sâko‐ŋeŋicko tumaŋnepie mupe huc hâmoc fua‐ŋareme râsi jaŋere meo fenʒepieŋ.
26Eme noni nânâ mâriri‐ŋeŋic baafeckepe ŋokac 10 jaŋe kuʒi mocjahao sawa nânâ rikerâ sigelio râehuc kâdoc qaŋarepie nârâ hesâsâc‐ŋopazejec.
27“Wiac iŋuc fua‐ŋarehame sifu micnane mi reŋkehuc dâŋnane qataraniŋmuo
28ine noni iŋuc jaha dâŋŋeŋic mi mamana fotariehuc sâqocne‐ŋeŋicte erâ bâtiŋ‐ŋopape arec 7 eocmu.
29Ehame qowire okacne naru motecfâo‐ŋeŋic nâcjopaniŋmu.
30No nemuɋâŋ fic hae‐ŋeŋic â hosâc âsu ririkere alata wiac‐ŋeŋic i hetâtierâ qâŋɋâŋfâc‐ŋeŋic nemuɋâŋ‐ŋeŋic ʒaŋkekicne irec faio behec‐jopape foniŋmu, eme honec‐ŋoparâ mamakâcnuocmu.
31Ehame no hae sâkofâc‐ŋeŋic ima bacjopahuc nemufic‐ŋeŋic hetâtierâ wiac âsu biaŋ‐ŋeŋicte takicnuocmu.
32Eme hae mâreŋ‐ŋeŋic imackepe râsifâc‐ŋeŋic jaŋe ira ŋec juc eniŋte fisi honerâ bipic tatara ejareocmu.
33No qâpuc gurune gurune jaŋere ŋondeŋko bâtâtiec‐ŋopahuc ʒikazi ŋopa jâpec eŋarepe mâreŋ‐ŋeŋic tuhu fuaha hae sâkofâc‐ŋeŋic jaŋe niniŋ siarereŋ fuarâ fonʒepieŋ.
34“Ŋoŋe râsifâc‐ŋeŋic jaŋere mâreŋko juhapie mâreŋ‐ŋeŋiczi niniŋ siarereŋ fuarâ foha sabata jara hombaŋ‐ticne maickeocmu, dameŋ ira hâcne mâreŋ‐ŋeŋiczi qoroc herâ fozejec.
35Mâreŋ e niniŋ siarereŋ fuarâ foocmu iŋuc jaha qoroc herâ forahuc juzejec hâcne. Ŋoŋe mâreŋ ira juhuc sabata jara hombaŋ mi ŋembiŋte iŋuc mi fojujec.
36Ʒanʒaŋnefâc‐ŋeŋic râsifâc‐ŋeŋic jaŋere mâreŋko juniŋmu jaŋe ejarepe maŋjeŋic gâckeme jâcrehac hâmocne mâŋâŋzi ficneme fânâŋkeme hâwic‐ŋopame wiseniŋmu, ine ŋic moczi ʒikare hâhâwicte wiseekac irec sâc wiseniŋmu hâcne, ehuc moczi moc jopa jâpec mi ejareha sifu waha jopaocmu.

Read Taha Bapare Sâcmutâc 26Taha Bapare Sâcmutâc 26
Compare Taha Bapare Sâcmutâc 26:16-36Taha Bapare Sâcmutâc 26:16-36