Taha Bapare Sâcmutâc 25:7-41

⁷Erâ hae qowi â kâte qowi mâreŋ‐ŋeŋicko jueŋgopieŋ jaŋere wâc mâmâc ezejec.

⁸“Eme ŋoŋe sabata jara hombaŋ iŋucne 7 guru 7 irec sâc wosekupie jara 49 ezejec.

⁹Eme jara 50 irec mosa 7 â ʒoaŋ gie bapa 10 ira ine qeŋ lama ʒuŋezi bakicne i qâsokapie fânâŋ‐ticne mâreŋ sâc rafârezejec. Ine kiwiric roro dameŋ ira hâcne qeŋ qapie fânâŋ‐ticnezi mâreŋ‐ŋeŋic sâcke‐fârezejec.

¹⁰Ŋoŋe iŋuc ehuc jara 50 i furu munʒepieŋ, ehuc hae mâreŋ sâc irec ŋic ŋokac jaŋe wama faio rambaŋ juniŋte jazanʒepieŋ. Ehuc ŋoŋe fic hae‐ŋeŋic sâc me wiacfâc‐ŋeŋic jaŋerao risiehuc manapie ʒeri bubiaŋ sâkohec ezejec.

¹¹Jara 50 izi hâcne ʒeri bubiaŋ dameŋ‐ŋeŋic ezejec. Ŋoŋe dameŋ ira hesarac gie me wiac bâtirikicnezi fârine fuaekac i qa roro mi enʒepieŋ, me waiŋ bâtâcne emasaŋ mi ekicnao fârine fuame wâc ro nusec mi enʒepieŋ.

¹²Dameŋ i bubiaŋ dameŋ, irec manapie tirine ezejec. Ehame mâreŋzi gume hesiwiŋ ecneocmu izi nânâ‐ŋeŋic ezejec.

¹³“Ŋoŋe ʒeri bubiaŋ dameŋ ira ru sâc hae mâreŋ‐ŋeŋicko risie‐fârenʒepieŋ.

¹⁴Ŋoŋe ŋic âgofâc‐ŋeŋic jaŋehec âbârâ gie bahuc nareŋ gareŋ sâcti qâtiric mi enʒepieŋ.

¹⁵Ʒeri hombaŋ juwicnao fuŋkerâ jara wezimuc juwefumbiŋ irec sâc manasuhuc ŋic âgofâc‐ŋeŋic jaŋeraonec wiac furine banʒepieŋ, erâ jara wezimuc qa roro gie baniŋmu irec manasuhuc moneŋte erâ mâreŋ mutara‐ŋarenʒepieŋ.

¹⁶Jara ʒoricne fome furine bafenʒepieŋ, me bembeŋne fome furine bawahanʒepieŋ. Jara wezimuc irec maŋnao he sara nâc eniŋmu irec manasuhuc mâreŋ qikiŋne‐ŋarenʒepieŋ hâcne.

¹⁷Ŋoŋe nareŋ gareŋ sâcti qâtiric mi ehuc Anutu‐ŋeŋic araŋ bacnenʒepieŋ. No hâcne Wofuŋ Anutu‐ŋeŋic jukopac.

¹⁸“Ŋoŋe irec hâcne dâŋsanaŋ‐nane bajuhuc mumutâc dâŋnane mana rereŋ enʒepieŋ. Iŋuc ehuc mâreŋko wama faio ŋec juc eniŋimu.

¹⁹Ehame mâreŋ‐ŋeŋicko nânâ mâriri sâko fuame nâ gapec ehuc wama faio juniŋmu.

²⁰Ŋoŋe ʒiŋuc muniŋmu mecne: ‘Nâŋe jara namba 7 ira he sarac â qa roro mi ehuc wemo wiac moc nâ bac enaŋmu?’

²¹Ŋoŋe iŋuc mupie ʒiŋuc ŋazapemu: No jara namba 6 ira jambuŋ‐ŋopape mâreŋ‐ŋeŋicko jara 3 irec sâc mâriri sâko fuarâ foocmu.

²²Irec jara 8 ira he sarac ehuc nânâ raŋɋane nânʒepieŋ, ehame jara 9 ira nânâ gie raŋɋanaonec jaha nâhuc juhapie ɋâricnezi fuazejec.

²³Ŋoŋe mâreŋ‐ŋeŋic i moneŋte erâ mi qikiŋne sanaŋkenʒepieŋ, ŋoŋe nohec juhuc ŋic furune â jabane sawa eŋgopieŋte mâreŋ i nore biŋe ekac hâcne.

²⁴Irec ŋoŋe mâreŋ ro rauc embiŋ i mâreŋ runezi mocwâc furine bazo mume mana uruecnenʒepieŋ.

²⁵“Âgo qomâge moczi hapetac juhuc mâreŋ‐ticne gâcne moneŋte erâ qikiŋneocmuo fisirâ âgo‐ticnezi mâreŋ qikiŋnewec i moneŋ râeme kitâcneme mocwâc bârisiecnezejec.

²⁶Me ŋic ere tuctofa moc mi juhuc mâreŋ bârisiecneocmuo, me e jahac juku moneŋ bâfuarâ mocwâc furine bazo muocmuo

²⁷ine ŋic moczi mâreŋ‐ticne furine barâ jara wezimuc bajuwec i manasuhuc moneŋ tofane sawa bârisiecnezejec, ehuc mâreŋ‐ticnao risiezejec.

²⁸Me mâreŋ i mocwâc e jahacne biŋe furine baocte moneŋ basarâ beheme ŋic furine bawec eki bajuhame ʒeri bubiaŋ jara hombaŋ sâko maickezejec. Eme hombaŋ dameŋ ira ine mâreŋ bajukac ŋic eki beheme runezi mocwâc fuarâ rauckezejec.

²⁹“Ŋic moc e hae sâko qânâsac‐ticnehec ira ficticne moc moneŋte erâ qikiŋneocmu mecne. Erâ jufehuc jara moc mi taraha fic izi mocwâc e jahacne biŋe eocte furine bazo murâ sâcne furine baocmu. E jara ŋondeŋ irec maŋnao iŋuc ezo mume manacnezo.

³⁰Me jara ŋondeŋ irec maŋnao runezi mocwâc furine bazo mi ecneme ine ŋic qanaŋ furine bawec e jahacne â ɋâricfâc‐ticne jaŋere biŋe erâ ŋefehuc juzejec. Ʒeri bubiaŋ jara hombaŋko ine fic i behepie runere biŋe mocwâc mi ezejec.

³¹Hae piticko fic sac tâmiric ŋerakac izi ine giegaŋte sâc jaha ekac, irec runezi mocwâc furine bahuc ŋec juc eniŋmu, â ʒeri bubiaŋ jara hombaŋ sâko ira behepie mocwâc runere biŋe ezejec.

³²Lewiŋic jaŋe hae sâko‐jeŋicko fic hae‐jeŋic moneŋte erâ qikiŋneeŋgopieŋ i ʒâhec dameŋ ira me ira mocwâc furine bahuc jaŋacne biŋe eocte mupie mana‐jarezo.

³³Me Lewiŋic moc e hae iŋucnao ficticne moneŋte erâ qikiŋnewec i mocwâc e jahacne biŋe eocte furine mi baocmu ine ʒeri bubiaŋ jara hombaŋko behepie mocwâc runere biŋe ezejec; Lewiŋic jaŋere hae sâkoo fic hae ŋerakac i Lewiŋic Israe ŋic jaŋere ŋondeŋko juraŋgopieŋ jaŋere biŋe hâcne.

³⁴Mâc giegaŋ‐jeŋic hae sâko orâŋkehuc forakac izi ine furi bapare biŋe mi ekac, i Lewiŋic jaŋere biŋe erâ fosanaŋkeocte mukicne.

³⁵“Âgo qomâ‐ŋeŋic moczi hapetac juhuc juju‐ticnere dope wiac sâcne mi bâfuaocmuo ine ŋoŋe bafickenʒepieŋ, ehame ŋic furune me jabane iŋucne ŋondeŋ‐ŋeŋicko juzejec.

³⁶Ŋoŋe moneŋ‐ŋeŋic tofane erao fokac i bafehuc mi jâoc ronʒepieŋ, aricne, ŋoŋe Anutu‐ŋeŋic araŋ bacnehuc juhapie âgo qomâ‐ŋeŋiczi ŋoŋehec juzejec.

³⁷Ŋoŋe moneŋ me nânâ râcneniŋmu irec furi bafehuc bârisie‐ŋareocte ʒoɋac mi ecnenʒepieŋ.

³⁸No Wofuŋ Anutu‐ŋeŋic, noni hâcne Kanaaŋ mâreŋ ŋarehuc Anutu‐ŋeŋic jupemurâ Aigita mâreŋkonec jowac‐ŋopa wefupo.

³⁹“Âgo qomâ‐ŋeŋic moczi hapetac erâ juhuc ŋoŋere kiŋaŋ qaqa erâ juzo mume mi manacnenʒepieŋ.

⁴⁰E ŋoŋehec ŋic jabane jaŋere sâc erâ juhuc moneŋ gie bazejec, e ŋoŋere kiŋaŋ qaqa gie iŋuc bahuc juhame ʒeri bubiaŋ jara hombaŋ sâko maickezejec.

⁴¹Hombaŋ ira ine naru motecfâc‐ticne jaŋehec behec‐ŋoparâ wiacfâc‐ticne jaŋerao risiezejec, ehuc mamac ŋosafâc‐ticne jaŋere mâreŋ rauckezejec.