Taha Bapare Sâcmutâc 25:34-48

³⁴Mâc giegaŋ‐jeŋic hae sâko orâŋkehuc forakac izi ine furi bapare biŋe mi ekac, i Lewiŋic jaŋere biŋe erâ fosanaŋkeocte mukicne.

³⁵“Âgo qomâ‐ŋeŋic moczi hapetac juhuc juju‐ticnere dope wiac sâcne mi bâfuaocmuo ine ŋoŋe bafickenʒepieŋ, ehame ŋic furune me jabane iŋucne ŋondeŋ‐ŋeŋicko juzejec.

³⁶Ŋoŋe moneŋ‐ŋeŋic tofane erao fokac i bafehuc mi jâoc ronʒepieŋ, aricne, ŋoŋe Anutu‐ŋeŋic araŋ bacnehuc juhapie âgo qomâ‐ŋeŋiczi ŋoŋehec juzejec.

³⁷Ŋoŋe moneŋ me nânâ râcneniŋmu irec furi bafehuc bârisie‐ŋareocte ʒoɋac mi ecnenʒepieŋ.

³⁸No Wofuŋ Anutu‐ŋeŋic, noni hâcne Kanaaŋ mâreŋ ŋarehuc Anutu‐ŋeŋic jupemurâ Aigita mâreŋkonec jowac‐ŋopa wefupo.

³⁹“Âgo qomâ‐ŋeŋic moczi hapetac erâ juhuc ŋoŋere kiŋaŋ qaqa erâ juzo mume mi manacnenʒepieŋ.

⁴⁰E ŋoŋehec ŋic jabane jaŋere sâc erâ juhuc moneŋ gie bazejec, e ŋoŋere kiŋaŋ qaqa gie iŋuc bahuc juhame ʒeri bubiaŋ jara hombaŋ sâko maickezejec.

⁴¹Hombaŋ ira ine naru motecfâc‐ticne jaŋehec behec‐ŋoparâ wiacfâc‐ticne jaŋerao risiezejec, ehuc mamac ŋosafâc‐ticne jaŋere mâreŋ rauckezejec.

⁴²Jaŋe nore kiŋaŋŋicfâc, noni hâcne Aigita mâreŋkonec jowac‐jopa wefupo, jaŋe moneŋte erâ kiŋaŋ qaqa mi bacjopazo.

⁴³Ŋoŋe Anutu‐ŋeŋic araŋ bacnehuc ŋic iŋucne ŋicbomboŋ ejarehuc mi bâʒâic‐jopanʒepieŋ.

⁴⁴Ŋoŋe kiŋaŋ ŋic ŋokac rocjopazo murâ ine qâpuc ŋic gurune gurune rârec rârec juraŋgopieŋ jaŋeraonec furi bacjopanʒepieŋ.

⁴⁵Me ŋic jabane â wiacfâc‐jeŋic ŋondeŋ‐ŋeŋicko jueŋgopieŋ me mâreŋ‐ŋeŋicko fuambiŋ jaŋeraonec wâc furi bacjopazo murâ furi bacjopapie ŋoŋere biŋe enʒepieŋ.

⁴⁶Erâ juku hâmoc dameŋ‐ŋeŋic maickeme ŋic iŋucne jaŋe ŋokâfâc‐ŋeŋic jaŋerao râec‐jopazo murâ râec‐jopapie jaŋere kiŋaŋ qaqa erâ junʒepieŋ. Israe ŋic qomâfâc‐ŋeŋic jaŋe ine ŋicbomboŋ ejarehuc mi bâʒâic‐jopanʒepieŋ.

⁴⁷“Ŋic furune me jabane moc moneŋ mafa sâkoheczi ŋoŋehec juhame qomâ‐ŋeŋic moczi hapetac erâ ŋic jabane e jahacne me soctofa‐ticne moc ere kiŋaŋ qaqa erâ juocmuo

⁴⁸ine hahac ɋafâc‐ticne jaŋeraonec moczi furi‐ticne râezo murâ râeme rambaŋko juzejec.