Taha Bapare Sâcmutâc 24:3-15

³Tutumaŋ qoruc bozeo qorac tapa katapa ŋekac irec ââketâc râpenao ira Aroŋzi ʒure emasaŋ ezejec; eme hae owâeme Wofuŋte maio qazeme ʒahuc ŋeha hae furezejec. Dâŋ izi gaŋne gaŋne dâŋsanaŋ‐ŋeŋic erâ forahuc juzejec.

⁴Lambe kikene golzi bakicne irec faio lambe ŋekac i ʒure emasaŋ eme Wofuŋte maio ʒuʒuhuc jaha ʒahuc ŋezejec.

⁵“Eme go poroŋ uucne rorâ nânâ poroŋ 12 rikezemec, nânâ poroŋ mocjahare sâc ine poroŋ uucne tase moc irec teŋkonec jajahec rocjofazemec.

⁶Ehuc tebo golzi bakicne irec faio biri jajahec râezemec, biri mocko nânâ poroŋ 6 â mocko 6 jaha, iŋuc râe razemec.

⁷Erâ nânâ poroŋ birickerâ wiac âsu biaŋ furi sâkozi ruacnezemec. Eme poroŋ âsu biaŋhec izi Wofuŋte taha bâzi ezejec.

⁸Eme Aroŋ e sabata hombaŋ sâc nânâ poroŋ iŋuc hâcne birickehuc juzejec. Israe ŋic jaŋe iŋuc ehuc juniŋte mutâcne‐jarekicne hâcne.

⁹Nânâ poroŋ i wiac tirine jâmbâŋ, irec Aroŋ â ŋokâfâcne jaŋere biŋe eha tirificko nânʒepieŋ. Wofuŋ taha bâzi rikecneniŋmu sâc wiac izi hâcne taha bapare biŋe erâ forahuc juzejec.”

¹⁰Ehame Israe ŋic jaŋere ŋondeŋko ŋic moc juwec e neŋgoc‐ticne Israe ŋokac â mamac‐ticne ine Aigita ŋic. E juku dameŋ mocko teuŋ‐jeŋicko Israe ŋic moc ehec dâŋ mumuc epic.

¹¹Ehuc ŋic e Wofuŋte ʒâŋe musoriŋkehuc sâweckewec. Iŋuc eme Moserao jowa rambiŋ. Neŋgoc‐ticnere ʒâŋe Selomiti, e Daŋ guruonec Dibirire otâ.

¹²Eme Wofuŋtaonec dâŋ okacne mananiŋte woŋec kâpâcwâru bapie ŋewec.

¹³Eme Wofuŋzi Mose kecʒiŋuc âzâcnewec:

¹⁴“Ŋic sâwecdâŋ muwec e mutec teuŋkonec jowa wahanʒepieŋ, ehame sâwecdâŋ mume manambiŋ jaŋe mejeŋic qizecnao râehapie kikefuŋ sasawa jaŋe qânâzi hehâmonʒepieŋ.

¹⁵Erâ Israe ŋic ʒiŋuc jazazemec: Moc e Anutu musoriŋkeocmu e kiŋsâko hureocmu.