Taha Bapare Sâcmutâc 22:6-32

⁶Wiac iŋucne hâcne ba bâuac eocmu ŋic e wâwânâŋhec erâ juha hae ŋafezejec, ehame tiri taha wiac moc mi nânâ qanaŋ opâ ruazejec.

⁷Izi ʒoaŋ hume ɋaɋackezejec. Eme faicnao tiri taha wiac izi nânâ‐ticne ekacte sâcne nâzejec.

⁸Qowi e jahac hâmoekac me qowi gâcnezi ki qâsuc ecneeŋgopieŋ i wâc wâwânâŋhec ekacte mi nâzejec, no Wofuŋ jukopac hâcne.

⁹Jaŋe qaqatara bâfuahuc kiŋhec erâ hâmonʒipiŋte mumutâc dâŋnane mana rereŋ enʒepieŋ. Wofuŋ noni hâcne bâtiric‐jopakopac.

¹⁰“Ŋic furunezi nânâ bâtirikicne moc mi nâzejec. Me ŋic moczi taha bapa ŋicmanac fisicneocmu, me taha bapare kiŋaŋŋic jabane, jahe wâc nânâ bâtirikicne mi nâzepirec.

¹¹Taha bapa kiŋaŋŋic‐ticne moneŋzi furine bakicne e me ficticnao fuambiŋ jaŋe ine sâcne nâniŋmu.

¹²Taha bapa otâ‐ticnezi ŋic furune moc baocmu e wâc iŋuc jaha taha bâtirikicne mi nâzejec.

¹³Mâc otâ‐ticne moczi hozec me ʒuhuc bâtâc erâ naru motec tâmiric juhuc mârâc naru‐ticnao juwec irec sâc mamac‐ticnere ficko risierâ juocmu eki ine mamac‐ticnere nânâ sâcne nâocmu; ŋic furunezi ine mi nâzejec.

¹⁴Me ŋic moczi fuŋne mi mana tarahuc nânâ bâtirikicne nâocmu e irec okacne râehuc ʒuhuckerâ moneŋ 5‐konec wâŋ bâfuarâ taha bapa râcnezejec.

¹⁵Israe ŋic jaŋe Wofuŋte tiri taha râeeŋgopieŋ i taha bapa jaŋe mi bâsifuckenʒepieŋ.

¹⁶Jaŋe iŋuc epie Israe ŋic jaŋe nânâ bâtirikicne i nâhuc kiŋ bahac bâfuanʒipiŋte iŋuc mi enʒepieŋ. Wofuŋ noni hâcne bâtiric‐jopakopac.”

¹⁷Eme Wofuŋzi Mose kecʒiŋuc âzâcnewec:

¹⁸“Go Aroŋ â ŋokâfâcne erâ Israe ŋic sasawa ʒiŋuc jazazemec: Israe kikefuŋ me ŋondeŋ‐ŋeŋicko ŋic jabane jueŋgopieŋ jaŋeraonec moczi mumupaŋ‐ticnere manasuhuc taha râeocmu, me buafec faio taha râehuc Wofuŋ rikecneocmu

¹⁹e bulimakao me lama me noniŋ ŋicne biaŋne moc râeme Wofuŋzi manacneme biaŋkezejec.

²⁰Ŋoŋe qowi repicne mi râenʒepieŋ, qowi iŋucnere Wofuŋzi mana‐ŋareme mi biaŋkeocmu.

²¹Ŋoŋeraonec moczi mumupaŋ‐ticnere manasuhuc me buafec faio Wofuŋ wama bâzi moc rikecnezo murâ ine qowi biaŋne â bahac fâsâc moc rikecnezejec.

²²Qowi ʒâŋe‐jeŋic hâpokicne me tuturuŋ‐jeŋic tarakicne me wichec me sahac opâ‐jeŋic wahaekac me korehec, iŋucne Wofuŋte taha râehuc alatao mi rikenʒepieŋ.

²³Bulimakao me lama me kike‐jeŋic herickekicne jaŋe buafec faio taha râezo murâ râenʒepieŋ, mâc mumupaŋ‐jeŋicte manasuhuc qowi iŋucne râepie mi sâckeocmu.

²⁴Qowi moc biŋticne bâropiekicne me kijacnekicne me bâpârâckekicne me bakicne i mâreŋ‐ŋeŋicko juhuc Wofuŋte taha mi râenʒepieŋ.

²⁵Erâ qowi iŋucne ŋic gurune gurune jaŋeraonec rorâ Anutu taha mi bacnenʒepieŋ. E qowi puriŋne iŋucne tahare râepie mana‐ŋareme mi biaŋkeocmu.”

²⁶Eme Wofuŋzi Mose kecʒiŋuc âzâcnewec:

²⁷“Bulimakao me lama me noniŋ motecne moc fuarâ neŋgocnehec juhame ʒoaŋ gie bapa 7 tarazejec. Eme ʒoaŋ gie bapa 8 ira fuŋkerâ jufehuc taha rârâere sâc eme alatao rikepie Wofuŋzi maname biaŋkeocmu.

²⁸Bulimakao me lama neŋgocne jahe motecnehec ʒoaŋ ijaha mi qâhâmoc‐jopanʒepieŋ.

²⁹Ŋoŋe Wofuŋ daŋge taha moc râcnezo murâ ine Wofuŋzi maname biaŋkeocte manasuhuc râenʒepieŋ.

³⁰Ŋoŋe taha i ʒoaŋ ijaha nâfârenʒepieŋ, tiwâne moc râepie foha hae mi furezejec. No Wofuŋ jukopac hâcne. “Ŋoŋe iŋuc ehuc sâcmutâc dâŋnane reŋkenʒepieŋ.

³¹No Wofuŋ jukopac hâcne.

³²Ehame tiri ʒâŋe‐nane mi bawahanʒepieŋ, aricne, Israe ŋic ŋoŋe nore manapie tiri jukopac ezejec, noni hâcne bâtiric‐ŋopakopac.