Taha Bapare Sâcmutâc 21:10-20

¹⁰“Taha bapa micne wokemaŋ ruacnehuc gie ŋaqi tirine rojuocte mufiriekicne e busâqocte erâ qizec susuc‐ticne beheme mi ʒorazejec, â ŋaqi wiac‐ticne mi bâsuckezejec.

¹¹Ehuc neŋgoc mamac jahec‐ticne me ŋic mocte qâŋɋâŋ fokacko raʒirâ wâwânâŋhec mi ezejec.

¹²E Anuture tiri wokemaŋ ruacnekicnere furufickonec mi wahazejec, â Anutu‐ticnere furufic i wâwânâŋ mi ecnezejec. No hâcne Wofuŋ jukopac.

¹³E ŋokac bazo murâ ine ŋokac ʒeŋoŋ rozejec.

¹⁴E hozec me ʒuhuc bâtâc ekicne me ŋokac wâwânâŋhec me sasec ŋokac, ŋokac iŋucne moc mi rozejec, aricne, e ŋicfâc‐ticne jaŋeraonec ŋokac ʒeŋoŋ moc rozejec hâcne.

¹⁵E iŋuc ehuc ŋicfâc‐ticne jaŋere ŋondeŋkonec naru motecfâc‐ticne mi bawahac‐jopazejec. Wofuŋ noni hâcne e bâtirikopac.”

¹⁶Wofuŋzi Mose ʒiŋuc âzâcnewec:

¹⁷“Go Aroŋ kecʒiŋuc âzâcnezemec: Ɋâricfâcge gaŋne gaŋne jufeniŋmu jaŋeraonec moczi sahac fâsâc mi juocmu e Wofuŋ taha bâzi rikecneocte mi maickezejec.

¹⁸Ŋic kecʒiŋucne jaŋe hâcne mi maickenʒepieŋ: Tiŋtuŋ me ʒeke puriŋ, me ʒâŋe mai‐jeŋic sâqorekicne, me tuturuŋ‐jeŋic tarakicne,

¹⁹me mekike‐jeŋic herickekicne,

²⁰me râpe kumbeŋ‐jeŋichec, me ŋic bembeŋne, me ʒâŋe‐jeŋic hâpokicne, me wic piic piic â korehec, me biŋjeŋic bakicne.