Taha Bapare Sâcmutâc 20:12-27

¹²Me ŋic moc e joŋao‐ticne bâsâqoreocmuo ine jahe mâmâc jaha qâhâmoc‐jofazo, jahe wâwânâŋhec epicte okacne fua‐jactezejec.

¹³Me ŋic moc e ŋokac jaŋehec foeŋgopieŋ irec sâc ŋic mochec foocmu ine jahe wiac mamakâcne epicte qâhâmoc‐jofazo, jahe okacne fisi‐jactezejec.

¹⁴Me ŋic moc e ŋokac moc â neŋgoc‐ticne rocjofame wiac hehesicne eocmu, irec jaŋe mâmâc ʒoczi ʒacjopame ŋondeŋ‐ŋeŋicko hehesiczi omaezejec.

¹⁵Me ŋic moczi qowi mochec foocmu ine ŋic mecne qowi mecne mâmâc qâhâmoc‐jofazo.

¹⁶Me ŋokac moczi qowi i me i moc maickerâ ehec foocmuo ine ŋokac mecne qowi mecne mâmâc qâhâmoc‐jofazo, jahe okacne fua‐jactezejec.

¹⁷“Ŋic moc e seŋoc‐ticne, mamac‐ticnere otâ me neŋgoc‐ticnere otâ hâcne, ehec mamanac ehuc sasec gie bapire wiac miminehec eocmu, irec jahe gurufâc‐jekic jaŋere ŋondeŋkonec bâsirowec‐jofazo. Ŋic e seŋticne bâsâqorewecte kiŋticnere okacne fuacnezejec.

¹⁸Me ŋic moc e ŋokac moc mosa huc dameŋ‐ticne maickeha bâsâqoreocmuo ine jahe mâmâc jaha ŋokac soc roro‐ticnere fuŋne bajaŋgeŋkenicmu, irec jahe gurufâc‐jekic jaŋere ŋondeŋkonec bâsirowec‐jofazo.

¹⁹Go neŋgocgere qo me mamacgere seŋ mi bâsâqorec‐jofazemec. Go iŋuc etec soctofa jahecge bâsâqorec‐jofakic eocmu. Irec kiŋŋeŋicte okacne fua‐ŋareocmu.

²⁰Me ŋic moc e woki‐ticne bâsâqoreocmuo ine wawa‐ticne mimi qaqa ecneocmu, irec ŋic e â woki‐ticne jahe sâqocne‐jekicte okacne hufiŋne erâ juku hâmozepirec.

²¹Me ŋic moc e qozi‐ticne bâsâqoreme wiac gâgâpâcne eocmu, ehuc hahac‐ticne mimi qaqa ecneocmu; irec jahe hufiŋne erâ juzepirec.

²²“Ŋoŋe irec hâcne dâŋsanaŋ â mumutâc dâŋnane sasawa i bajuhuc mana rereŋ efârenʒepieŋ, ehame mâreŋ qikiŋne‐ŋarepe ŋec juc eniŋmu izi râsi mi eŋarezejec.

²³Ŋoŋe ŋic gurune gurune mai‐ŋeŋicko jâpe bâsuec ejarekopac jaŋere hata mi âtenʒepieŋ, jaŋe hâcne wiac i sasawa efârepie honec‐joparâ mamakâcnuwec.

²⁴Ŋoŋe ine dâŋ ʒiŋuc muhuc mupaŋke‐ŋarepo: ‘Ŋoŋe jaŋere mâreŋ susu â baŋac fusucmarâ qâmbâriŋkeekac i hâcne ro rauc epie ŋoŋere biŋe ezejec.’ No Wofuŋ ŋoŋere Anutu, noni hâcne ŋic gurune gurune jaŋere ŋondeŋkonec rowosâec‐ŋopapo.

²⁵Ŋoŋe irec hâcne wipe qowi wâwânâŋhec â wâwânâŋ tâmiric hone râwiŋ‐jopanʒepieŋ. No wipe qowi me mâreŋko wiac babarâ jueŋgopieŋ jaŋe biac bâtâc bacjopapore nâcjopahuc me ba bâuac ejarehuc wâwânâŋhec mi enʒepieŋ.

²⁶No Wofuŋ tirine jukopacte ŋoŋe iŋuc jaha nore maio tiri jaha junʒepieŋ. Ŋoŋe nore biŋe erâ juniŋte ŋic gâcne jaŋere ŋondeŋkonec rowosâec‐ŋopapo.

²⁷“Ŋic me ŋokac moc e bawe me faŋfaŋ wira hefârec ejareocmu e hâmocte biŋe ezejec. Ŋic iŋucne jaŋe hâcne qânâzi hehâmoc‐jopanʒepieŋ. Jaŋe kiŋjeŋicte okacne fisi‐jarezejec.”