Taha Bapare Sâcmutâc 18:9-29

⁹Go mamacgere me neŋgocgere otâ, seŋge hâcne, soctofage me seŋocge bâsâqorehuc mimi qaqa mi ecnezemec.

¹⁰Go ŋosage mi bâsâqorezemec, gahacne faio mimi fezacte iŋuc mi ezemec.

¹¹Go neŋgococgere otâ, mamacgezi bâfuawec e mi bâsâqorezemec, e seŋge jaha, irec mimi qaqa mi ecnezemec.

¹²Go neŋgoc piticge mi bâsâqorezemec, e mamacgere soctofa hâcne.

¹³Go neŋgoc piticge mi bâsâqorezemec, e neŋgocgere soctofa hâcne.

¹⁴Mamac jahecge hahac ɋa jahere ŋokac mi bâsâqorec‐jofazemec, jahe neŋgoc jahecge jaha.

¹⁵Go joŋaoge mi bâsâqorezemec, e hâcne ŋokâgere ŋokac, irec e mimi qaqa mi ecnezemec.

¹⁶Go qozige mi bâsâqorezemec, hahacge mimi qaqa ecnezicte.

¹⁷Go ŋokac moc â naru‐ticne mi bâsâqorec‐jofazemec, me joŋao‐ticne me ŋosa‐ticne jahe wâc mi bâsâqorec‐jofazemec, jahe soctofa jahec‐ticne, irec jahehec sâqocne bapa i wiac hâhâtâne.

¹⁸Go ŋonâŋge juhame qoticne mamare bajuhuc mi bâsâqorezemec.

¹⁹“Go ŋokac moc mosa dameŋ‐ticne maickeha bâsâqorecmurâ mi fuacnezemec.

²⁰Go ŋic âgogere ŋokac bâsâqorehuc wâwânâŋhec mi ezemec.

²¹Go naru motecfâcge Moleke nemure biŋe râec‐jopahuc Anuture ʒâŋe mi sipirickezemec. No Wofuŋ jukopac hâcne.

²²Ŋokac jaŋehec foeŋgopieŋ irec sâc ŋic jaŋehec mi fozemec, iŋuc etec wiac mamakâcne eocmu.

²³Go qowi moc bâsâqorehuc wâwânâŋhec mi ezemec; â ŋokac moczi qowi ŋicnehec sasec gie mi bazejec, iŋuc eme wiac mamakâcne jâmbâŋ eocmu.

²⁴“Go wiac mukicne sasawa i ebac ehuc wâwânâŋhec mi ezemec; no ŋoŋere maio qâpuc ŋic gurune gurune jâpec‐jopape wiseŋgopieŋ jaŋe hâcne wiac iŋucne ebac ehuc wâwânâŋhec embiŋ.

²⁵Jaŋe iŋuc epie mâreŋ‐jeŋiczi wâwânâŋhec ewec; eme no kiŋjeŋicte erâ okacne bazu‐jarepe mâreŋ‐jeŋic tuhutac fuawec.

²⁶Ŋoŋe ine dâŋsanaŋ â mumutâc dâŋnane reŋkerâ bâjâpehuc wiac mamakâcne keci moc mi enʒepieŋ, mâreŋ rune ŋoŋe mecne â ŋic jabane ŋondeŋ‐ŋeŋicko jueŋgopieŋ jaŋe mecne.

²⁷(Ŋic mârâc jaha mâreŋ ʒi rauckerâ jumbiŋ jaŋe hâcne wiac i ebac epie mâreŋ i wâwânâŋhec ewec.)

²⁸Ŋoŋe iŋuc epie mâreŋzi mârâc jaha tuhutac fuarâ fowec irec sâc fuaocmu.

²⁹Ŋic izi me izi wiac mamakâcne keci moc ebac eocmu e ŋic âgofâc‐ticne jaŋere ŋondeŋkonec bâsirowezo.