Taha Bapare Sâcmutâc 17:3-12

³Israe kikefuŋkonec ŋic moc e bulimakao me lama me noniŋ hae maŋnao me hae râpeo qâhâmorâ

⁴Wofuŋte tiri bozeo taha râeocte tutumaŋ qoruc bozere motâcko mi bafisiocmuo ine soc hoŋkewec irec kiŋ i ŋic ere faio feme ŋic âgofâcne jaŋere guruonec bâsirowezo.

⁵Israe ŋic jaŋe taha bâzire qowi gieo qâhâmoc‐jopaeŋgopieŋ i Wofuŋte biŋe qahuc tutumaŋ qoruc bozere motâcko taha baparao bafisirâ ira wama bâzire biŋe qâhâmorâ Wofuŋ taha bacnenʒepieŋ.

⁶Ehame taha bapazi irec soc rorâ Wofuŋte alata tutumaŋ qoruc bozere motâcko ŋekac ira tiezejec, ehuc wokemaŋ‐jeŋic ine ʒocko rikeme Wofuŋte maio âsu biaŋ fuazejec.

⁷Israe ŋic jaŋe taha bâzire qowi‐jeŋic i nemu sâqocne kiŋaŋ qajareeŋgopieŋ jaŋere biŋe mocwâc mi qâhâmonʒepieŋ. Dâŋ izi ŋic gaŋne gaŋne fuarâ juniŋmu sâc jaŋere dâŋsanaŋ erâ fozejec.

⁸“Erâ ʒiŋuc ʒuhuckerâ jazazemec: Israe kikefuŋ ŋoŋeraonec, me ŋondeŋ‐ŋeŋicko ŋic jaba jueŋgopieŋ jaŋeraonec moczi qowi bâzi rikehuc

⁹tutumaŋ qoruc bozere motâcko bafisirâ Wofuŋ taha mi bacneocmu ine ŋic e âgofâcne jaŋere guruonec bâsirowezo.

¹⁰“Israe kikefuŋ ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc nâocmu e ine râsi ecnehuc ŋic âgofâc‐ticne jaŋere guruonec bâsirowepemu.

¹¹Jujure tâpiri i socko fokac hâcne; eme no irec hâcne taha bapazi kiwiric‐ŋeŋic rohuc alatao hoŋkeocte mupo. Jujure tâpiri i socko fokacte taha bapazi iŋuc ehuc kiwiric‐ŋeŋic sâcne roocmu.

¹²No irec hâcne Israe ŋic kecʒiŋuc jazapo: Ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc mi nâzejec.