7Ehuc ŋic wicsanaŋheczi ɋiɋic qaocte bafisimbiŋ e soc ruacneme arec 7 ezejec. Iŋuc erâ ʒiŋuc âzâcnezejec: Ɋaɋackekomec hâcne. Iŋuc muhuc wipe ɋâricne sawao beheme ferâ razejec.
8Eme ŋic ɋiɋic qaocte mukicne e qoruc wiac‐ticne ʒurerâ qizec‐ticne rozejec, ehuc e jahacne opâ ruarâ ɋaɋackezejec. Eme irec faicnao haeo raʒirâ boze râpeo ŋehuc juha ʒoaŋ gie bapa 7 tarazejec.
9Eme ʒoaŋ gie bapa namba 7 ira ine qizec‐ticne mocwâc rohuc mecʒâwâ â ʒâŋe susuc‐ticne â sahac ʒâwâ‐ticne sasawa hefârezejec. Iŋuc erâ ŋaqi qoruc‐ticne mocwâc ʒurehuc e jahacne wâc opâ ruarâ ɋaɋackezejec.
10“Erâ ʒoaŋ gie bapa namba 8 ira wiac kecʒiŋuc bacjopa fisizejec: Lama ŋicne biaŋne jajahec â lama ŋokacne biaŋne moc jara‐ticne wâŋ ekicne erâ poroŋ uucne oto moc irec 10‐konec 3 wokemaŋhec bâsifuckekicne â wokemaŋ opâ kiruŋ moc.
11Eme taha bapa e ŋic wâwânâŋhec eki ɋaɋackeocte taha gie baocmuzi ŋic e jahacne â wiac bafislocmu i tutumaŋ qoruc bozere motâcko Wofuŋte maio râec‐jopazejec.
12Ehuc lama ŋicne moc â wokemaŋ opâ kiruŋhec i kiŋ tatara tahare biŋe râehuc Wofuŋte maio fenʒoŋkezejec.
13Iŋuc erâ sâqocne tâtâmire tahare biŋe qowi â qowi bâzi tahare biŋe qâhâmoeŋgopieŋ alata mutirikicne ira lama qâhâmozejec; kiŋ tatarare tahazi sâqocne tâtâmire taha iŋucne taha bapare biŋe ekac irec, i wiac tirine jâmbâŋ.
14Eme taha bapa e kiŋ tatara tahare soc gâcne rorâ ŋic ɋaɋackeocte mukicne ere hazec fâreopec â meneŋgoc‐ticne fâreopec â kike neŋgoc‐ticne fâreopec i ruacne‐fârezejec.
15Taha bapa e iŋuc erâ wokemaŋ opâ kiruŋko ŋekac i gâcne e jahacne metape qanaopec ira hoŋkezejec.
16Izi memotec‐ticne fâreopec wokemaŋ ira âke uruckerâ Wofuŋte maio tieme arec 7 ezejec.
17Wokemaŋ tiwâne ŋeocmu i ine ŋic ɋaɋackeocte mukicne ere hazec fâreopec â meneŋgoc‐ticne fâreopec erâ kike neŋgoc‐ticne fâreopec kiŋ tatarare soc ruacnekicne irec faio ruacne‐fârezejec.
18Wokemaŋ opâ tofane taha bapare meo ŋeocmu i ine ŋic ɋaɋackeocte mukicne ere faio hoŋkezejec. Iŋuc ehuc Wofuŋte maio kiwiric jâoc rozejec.
19Taha bapa e ŋic ɋaɋackeocte mukicne ere kiwiric rohuc sâqocne tâtâmire taha hâcne râezejec. Iŋuc ehuc ʒâhec qowi bâzi ririkere qowi qâhâmozejec.
20Qâhâmorâ qowi bâzi â taha bâzi i alatao rikezejec. Taha bapa e iŋuc ehuc ŋic kiwiric jâoc rome ɋaɋackezejec.
21“Me ŋic e hapetacte wiac iŋucne sâko râeocte quŋkeocmuo ine kiŋ tatara taha fenʒoŋkehuc kiwiric jâoc roniŋte lama ŋicne mocjaha sawa râezejec. Taha bâzire ine poroŋ uucne wokemaŋhec bâsifuckekicne oto moc irec 10‐konec wâŋ erâ wokemaŋ opâ kiruŋ moc bafisizejec.
22Ehuc hapâ jajahec me buni jajahec, ine focneocmu sâc râezejec, ehame moc i sâqocne tâtâmire tahare biŋe â moc i qowi bâzi tahare biŋe ezejec.
23Ŋic e ɋaɋackerâ wiac i ʒoaŋ gie bapa namba 8 ira taha baparao tutumaŋ qoruc bozere motâcko Wofuŋte maio râezejec.
24Eme taha bapa e kiŋ tatara tahare lama â wokemaŋ kiruŋ i rorâ taha bahuc Wofuŋte maio fenʒoŋkezejec.
25Ehuc kiŋ tatara tahare lama qâhâmorâ socticne gâcne rorâ ŋic ɋaɋackeocte fisiocmu ere hazecɋoŋ fâreopec â meneŋgoc‐ticne fâreopec erâ kike neŋgoc‐ticne fâreopec i ruacne‐fârezejec.
26Taha bapa e iŋuc erâ wokemaŋ opâ kiruŋko ŋekac i gâcne e jahacne metape qanaopec ira hoŋkezejec.
27Izi memotec‐ticne fâreopec wokemaŋ opâ ira âke uruckerâ Wofuŋte maio tieme arec 7 ezejec.
28Wokemaŋ gâcne ine ŋic ɋaɋackeocte mukicne ere hazecɋoŋ fâreopec â meneŋgoc‐ticne fâreopec erâ kike neŋgoc‐ticne fâreopec kiŋ tatara tahare soc ruacnekicne irec faio ruacne‐fârezejec.
29Wokemaŋ opâ tofane taha bapare meo ŋeocmu i ine ŋic ɋaɋackeocte mukicne ere faio hoŋkezejec. Iŋuc ehuc Wofuŋte maio kiwiric‐ticne rozejec.
30Eme ŋic e hapâ me buni moc jucneŋgopieŋko taha bazejec.
31Ine moc sâqocne tâtâmire tahare biŋe â moc qowi bâzi tahare biŋe eha taha bâzi mâmâc râezejec. Ehame taha bapazi ŋic ɋaɋackewec ere kiwiric rozejec.
32Ŋic moc wicsanaŋhec juku biaŋkeweczi taha wiac râezo eipieocmu ere sâcmutâc iŋuc hâcne fokac.”
33Wofuŋzi Mose â Aroŋ ʒiŋuc jasawec:
34“No Kanaaŋ mâreŋ i ŋoŋere biŋe eocte ŋare tahac epemu. Eme ŋoŋe ira fisirâ juhapie mupe fic hae‐ŋeŋic gukuckeme
35fic runezi taha baparao rarâ ʒiŋuc âzâcnezejec: No honepe fic hae‐nane gukuckekac iŋuc tinac ekac.
36Iŋuc âzâcneme taha bapazi ficmaŋko wiac sasawa fokac i ropie waha‐fâreocte jazazejec. Wiac i wâwânâŋhec efârekac muzacte iŋuc enʒepieŋ. Eme ropie waha‐fâreme taha bapazi ficmaŋko fezejec.
37Ferâ fic gukuckewec i honezejec; ehame ficsâpe gukuckehuc qondaŋ qarâ gufewec,
38taha bapazi iŋuc honerâ fickonec waharâ motâc ki bame ʒoaŋ gie bapa 7 fozejec.
39Eme taha bapa e ʒoaŋ gie bapa namba 7 ira risierâ mocwâc honezejec. Ehame gukuczi fic sâpenao soka ŋedâmârec eme
40honerâ jazame qânâ gukuc hawarinehec i bârârierâ hae râpeo jawao tuŋkepie razejec.
41Erâ qânâ sâpe fainao rârec rârec simeŋ fokac i fâze emasaŋ eniŋte jazazejec wâc. Eme wiac fâzekicne i hae râpeo jaha jawao hoŋkepie razejec.
42Erâ qânâ ɋâricne rorâ ŋeŋetacnao hepie ŋeha simeŋzi ʒimickenʒepieŋ.
43“Eme qânâ wiac ropie wahaocmu â sâpe fâze emasaŋ erâ simeŋ ɋâricnezi ʒimickepie fainao mocwâc gukuckeocmuo
44ine taha bapazi ra honezejec. Eme gukuczi fic maŋnao soka ŋedâmârec eme ʒiŋuc manazo: Gukuc repicnezi fic maŋne fusucmakacte wâwânâŋhec ekac.
45Iŋuc manarâ fic i heropierâ qânâ â paraŋ wiac‐ticne erâ simeŋ ʒimickekicne i hae râpeo jawao behepie razejec.
46Me ŋic moc e ficzi motâc hehe foha raʒiwecko ine wâwânâŋhec erâ juha hae ŋafezejec.
47Me moc e fic ira foocmuzi ŋaqi‐ticne ʒurezejec, â moc e fic ira nânâ nâocmu e wâc iŋuc jaha ŋaqi‐ticne ʒurezejec.
48“Me fic i simeŋ ɋâricnezi bâpiaŋkepie faicnao gukuczi mocwâc mi fuame taha bapazi honerâ ʒiŋuc muzejec: Gukuczi omaeme ficzi ɋaɋacne jaha ŋekac.
49Eme fic i wâwânâŋ tâmiric ʒuhuckerâ ŋeocte taha bapazi wipe piticne jajahec â jâmâzâc jâc dâkâne erâ muc bâbâroŋ â wiac âsu biaŋhec rozejec.
50Rorâ wipe moc kuʒimaŋko opâ ɋâricne ŋekac irec faicnao qâhâmozejec.
51Iŋuc erâ jâmâzâc jâc dâkâne erâ wiac âsu biaŋhec â muc bâbâroŋ i wipe qâhâmokicnere socko mecne â opâ ɋâricnao mecne âke uruckerâ ficmaŋko tieme arec 7 ezejec.
52E iŋuc ehuc wipesoc â opâ ɋâricne â wipe ɋâricne â jâmâzâc jâc dâkâne erâ wiac âsu biaŋhec â muc bâbâroŋ izi ficmaŋne ʒure ɋaɋackezejec.
53Tarame wipe ɋâricne i hae râpeo sawao beheme ferâ razejec. E iŋuc ehuc ficte due bame fic izi hâcne ɋaɋackezejec.”
54Wicsanaŋ fuŋne fuŋne irec sâcmutâc iŋuc hâcne fokac.
55Wic sâfiru me ŋaqio me ficko gukuc fuakac,
56me sisiwiŋ me ɋâɋâfoŋ me pârâc fuame
Taha Bapare Sâcmutâc 14
Taha Bapare Sâcmutâc 14:7-56