Taha Bapare Sâcmutâc 14:1-39

¹Wofuŋzi Mose kecʒiŋuc âzâcnewec:

²“Ŋic wicsanaŋheczi ɋiɋic qaocmu ʒoaŋ ira sâcmutâc dâŋ kecʒiŋuc fokac irec sâcko ecnezo: Ŋic e taha baparao baranʒepieŋ.

³Eme taha bapazi hae râpenao hurâ ŋic e hone manac ecnezejec. Eme ŋic e ɋiɋic qawec,

⁴taha bapazi iŋuc honerâ mume ŋic ere biŋe taha râepie ɋaɋackeocte wiac kecʒiŋuc bafisinʒepieŋ: Wipe ɋâricne biaŋne jajahec â jâmâzâc jâc dâkâne moc, erâ muc bâbâroŋ â wiac âsu biaŋhec.

⁵Erâ taha bapazi jazame wipe moc i kuʒimaŋko opâ ɋâricne ŋekac irec fainao qâhâmonʒepieŋ.

⁶Ine wipe ɋâricne â jâmâzâc jâc dâkâne erâ muc bâbâroŋ â wiac âsu biaŋhec i rocjoparâ wipe opâ faio qâhâmokicne irec socko âke uruc‐jopazejec.

⁷Ehuc ŋic wicsanaŋheczi ɋiɋic qaocte bafisimbiŋ e soc ruacneme arec 7 ezejec. Iŋuc erâ ʒiŋuc âzâcnezejec: Ɋaɋackekomec hâcne. Iŋuc muhuc wipe ɋâricne sawao beheme ferâ razejec.

⁸Eme ŋic ɋiɋic qaocte mukicne e qoruc wiac‐ticne ʒurerâ qizec‐ticne rozejec, ehuc e jahacne opâ ruarâ ɋaɋackezejec. Eme irec faicnao haeo raʒirâ boze râpeo ŋehuc juha ʒoaŋ gie bapa 7 tarazejec.

⁹Eme ʒoaŋ gie bapa namba 7 ira ine qizec‐ticne mocwâc rohuc mecʒâwâ â ʒâŋe susuc‐ticne â sahac ʒâwâ‐ticne sasawa hefârezejec. Iŋuc erâ ŋaqi qoruc‐ticne mocwâc ʒurehuc e jahacne wâc opâ ruarâ ɋaɋackezejec.

¹⁰“Erâ ʒoaŋ gie bapa namba 8 ira wiac kecʒiŋuc bacjopa fisizejec: Lama ŋicne biaŋne jajahec â lama ŋokacne biaŋne moc jara‐ticne wâŋ ekicne erâ poroŋ uucne oto moc irec 10‐konec 3 wokemaŋhec bâsifuckekicne â wokemaŋ opâ kiruŋ moc.

¹¹Eme taha bapa e ŋic wâwânâŋhec eki ɋaɋackeocte taha gie baocmuzi ŋic e jahacne â wiac bafislocmu i tutumaŋ qoruc bozere motâcko Wofuŋte maio râec‐jopazejec.

¹²Ehuc lama ŋicne moc â wokemaŋ opâ kiruŋhec i kiŋ tatara tahare biŋe râehuc Wofuŋte maio fenʒoŋkezejec.

¹³Iŋuc erâ sâqocne tâtâmire tahare biŋe qowi â qowi bâzi tahare biŋe qâhâmoeŋgopieŋ alata mutirikicne ira lama qâhâmozejec; kiŋ tatarare tahazi sâqocne tâtâmire taha iŋucne taha bapare biŋe ekac irec, i wiac tirine jâmbâŋ.

¹⁴Eme taha bapa e kiŋ tatara tahare soc gâcne rorâ ŋic ɋaɋackeocte mukicne ere hazec fâreopec â meneŋgoc‐ticne fâreopec â kike neŋgoc‐ticne fâreopec i ruacne‐fârezejec.

¹⁵Taha bapa e iŋuc erâ wokemaŋ opâ kiruŋko ŋekac i gâcne e jahacne metape qanaopec ira hoŋkezejec.

¹⁶Izi memotec‐ticne fâreopec wokemaŋ ira âke uruckerâ Wofuŋte maio tieme arec 7 ezejec.

¹⁷Wokemaŋ tiwâne ŋeocmu i ine ŋic ɋaɋackeocte mukicne ere hazec fâreopec â meneŋgoc‐ticne fâreopec erâ kike neŋgoc‐ticne fâreopec kiŋ tatarare soc ruacnekicne irec faio ruacne‐fârezejec.

¹⁸Wokemaŋ opâ tofane taha bapare meo ŋeocmu i ine ŋic ɋaɋackeocte mukicne ere faio hoŋkezejec. Iŋuc ehuc Wofuŋte maio kiwiric jâoc rozejec.

¹⁹Taha bapa e ŋic ɋaɋackeocte mukicne ere kiwiric rohuc sâqocne tâtâmire taha hâcne râezejec. Iŋuc ehuc ʒâhec qowi bâzi ririkere qowi qâhâmozejec.

²⁰Qâhâmorâ qowi bâzi â taha bâzi i alatao rikezejec. Taha bapa e iŋuc ehuc ŋic kiwiric jâoc rome ɋaɋackezejec.

²¹“Me ŋic e hapetacte wiac iŋucne sâko râeocte quŋkeocmuo ine kiŋ tatara taha fenʒoŋkehuc kiwiric jâoc roniŋte lama ŋicne mocjaha sawa râezejec. Taha bâzire ine poroŋ uucne wokemaŋhec bâsifuckekicne oto moc irec 10‐konec wâŋ erâ wokemaŋ opâ kiruŋ moc bafisizejec.

²²Ehuc hapâ jajahec me buni jajahec, ine focneocmu sâc râezejec, ehame moc i sâqocne tâtâmire tahare biŋe â moc i qowi bâzi tahare biŋe ezejec.

²³Ŋic e ɋaɋackerâ wiac i ʒoaŋ gie bapa namba 8 ira taha baparao tutumaŋ qoruc bozere motâcko Wofuŋte maio râezejec.

²⁴Eme taha bapa e kiŋ tatara tahare lama â wokemaŋ kiruŋ i rorâ taha bahuc Wofuŋte maio fenʒoŋkezejec.

²⁵Ehuc kiŋ tatara tahare lama qâhâmorâ socticne gâcne rorâ ŋic ɋaɋackeocte fisiocmu ere hazecɋoŋ fâreopec â meneŋgoc‐ticne fâreopec erâ kike neŋgoc‐ticne fâreopec i ruacne‐fârezejec.

²⁶Taha bapa e iŋuc erâ wokemaŋ opâ kiruŋko ŋekac i gâcne e jahacne metape qanaopec ira hoŋkezejec.

²⁷Izi memotec‐ticne fâreopec wokemaŋ opâ ira âke uruckerâ Wofuŋte maio tieme arec 7 ezejec.

²⁸Wokemaŋ gâcne ine ŋic ɋaɋackeocte mukicne ere hazecɋoŋ fâreopec â meneŋgoc‐ticne fâreopec erâ kike neŋgoc‐ticne fâreopec kiŋ tatara tahare soc ruacnekicne irec faio ruacne‐fârezejec.

²⁹Wokemaŋ opâ tofane taha bapare meo ŋeocmu i ine ŋic ɋaɋackeocte mukicne ere faio hoŋkezejec. Iŋuc ehuc Wofuŋte maio kiwiric‐ticne rozejec.

³⁰Eme ŋic e hapâ me buni moc jucneŋgopieŋko taha bazejec.

³¹Ine moc sâqocne tâtâmire tahare biŋe â moc qowi bâzi tahare biŋe eha taha bâzi mâmâc râezejec. Ehame taha bapazi ŋic ɋaɋackewec ere kiwiric rozejec.

³²Ŋic moc wicsanaŋhec juku biaŋkeweczi taha wiac râezo eipieocmu ere sâcmutâc iŋuc hâcne fokac.”

³³Wofuŋzi Mose â Aroŋ ʒiŋuc jasawec:

³⁴“No Kanaaŋ mâreŋ i ŋoŋere biŋe eocte ŋare tahac epemu. Eme ŋoŋe ira fisirâ juhapie mupe fic hae‐ŋeŋic gukuckeme

³⁵fic runezi taha baparao rarâ ʒiŋuc âzâcnezejec: No honepe fic hae‐nane gukuckekac iŋuc tinac ekac.

³⁶Iŋuc âzâcneme taha bapazi ficmaŋko wiac sasawa fokac i ropie waha‐fâreocte jazazejec. Wiac i wâwânâŋhec efârekac muzacte iŋuc enʒepieŋ. Eme ropie waha‐fâreme taha bapazi ficmaŋko fezejec.

³⁷Ferâ fic gukuckewec i honezejec; ehame ficsâpe gukuckehuc qondaŋ qarâ gufewec,

³⁸taha bapazi iŋuc honerâ fickonec waharâ motâc ki bame ʒoaŋ gie bapa 7 fozejec.

³⁹Eme taha bapa e ʒoaŋ gie bapa namba 7 ira risierâ mocwâc honezejec. Ehame gukuczi fic sâpenao soka ŋedâmârec eme