Taalie 6:7-28

⁷Mangɛ mu na dondoli bɛ, kuntigi nun yarerati fan mu a bɛ,

⁸kɔnɔ a walima sogofure tɛmui, alako a xa baloe sɔtɔ a naxan donma ɲɛmɛ ra.

⁹I tan tunnaxɔnɛ, i i sama han mun tɛmui? I kelima xixɔli ma tɛmui mundun?

¹⁰Xixɔli na i suxu, i na kinsɔn, i na i sa,

¹¹setareɲa fan fama nɛ i suxude tɛrɛnna ra, alɔ muɲɛti mixi tɛrɛnnama ki naxɛ. Kaamɛ i suxuma nɛ, alɔ sɔɔri mixi suxuma ki naxɛ.

¹²Fuyante mu tinxin, a wule raɲɛrɛma a dɛ i nɛ.

¹³A luma a ya magira ra, a nu mixi makebentin a sanyie nun a bɛlɛxɛe ra wule tɔnxuma ra.

¹⁴Fe ɲaaxi na a xaxili kui, a gere masoma tɛmui birin.

¹⁵Na kui kasarɛ fama nɛ a suxude, a a xun nakana kerenyi ra.

¹⁶Fe senni na Alatala naxee xɔnxi, a mu tinma nee ra fefe ma:

¹⁷yɛtɛ igboe xa mixi mato ki, wule minima dɛ naxan kui, bɛlɛxɛ naxan nii bama fufafu ra,

¹⁸bɔɲɛ naxan fe tinxintare maɲɔxunma, sanyi naxee e gima sigafe ra fe kobi rabade,

¹⁹seede naxan wule falama, a nun mixi naxan ngaxakerenmae tagi isoma.

²⁰N ma di, i baba xa sɛriyɛ ragata, i naxa tondi i nga xa marasi ra.

²¹E xa lu i bɔɲɛ kui tɛmui birin, e xiri i kɔn ma.

²²E i raɲɛrɛma nɛ i xa duniɲɛigiri kui, e i makanta i xa sade ma, e i rasi i keli tɛmui.

²³Na sɛriyɛ findixi lanpui nan na, na xaranyi kira masenma nɛ i bɛ, na marasi i xun tima simaya kira nan xɔn ma.

²⁴E i ratangama ginɛ kobi ma, nun xɔɲɛ ginɛ dɛ iɲɔxunxi ma.

²⁵I naxa wa na ginɛ xɔn ma a xa tofanyi ma, i naxa tin a xa nɔ i ra a yae ra.

²⁶Langoe ginɛ naxan mu na xɛmɛ taa, a mixi findima setare nan na, kɔnɔ ginɛ yɛnɛla naxan dɔxɔxi xɛmɛ nde xɔn, a mixi faxama nɛ.

²⁷Mixi nde nɔma tɛ tongode, a a sa a yuba kui, a fa lu a xa donma mu gan?

²⁸Mixi nde nɔma a ɲɛrɛde tɛ wole tagi, a fa lu a sanyi mu gan?