Taalie 4:2-22

²barima n na lɔnni fanyi nan fife wo ma yi ki. Wo naxa tondi n ma masenyi ra.

³Di fanyi nan nu n na n baba bɛ. Di kerenyi nan nu n na n nga bɛ.

⁴N baba nu n nasima yi wɔyɛnyi nan na, a naxɛ, «I xa n ma masenyi ragata i bɔɲɛ kui, i xa n ma sɛriyɛ suxu alako i xa simaya sɔtɔ.

⁵I xa lɔnni fen, xaxili fanyi xa lu i bɛ. I naxa nɛɛmu n ma masenyi ma, i naxa nɛɛmu n ma sɛriyɛ ma.

⁶I naxa e rabɛɲin, e i makantama nɛ. N ma sɛriyɛ xa rafan i ma, a i ratangama nɛ.»

⁷Lɔnni fɔlɛ nan yi ki: I xa lɔnni fen, i xa fe birin naba alako i xa xaxili sɔtɔ.

⁸Xa i xaxilimaya binya, a i itema nɛ. Xa i a suxu, a i xunnakelima nɛ.

⁹A findima xunmase tofanyi nan na i xunyi ma, a findi diyaman xa yanbɛ ra i bɛ.

¹⁰N ma di, xa i i tuli mati n ma masenyi ra, i xa simaya xɔn kuyama nɛ.

¹¹N bara xaxilimaya kira masen i bɛ, n bara i ti kira tinxinxi xɔn ma.

¹²Xa i i ɲɛrɛma na kira nan ma, i mu tɔɔrɔma. Xa i i gima na kira nan xɔn ma, i mu dinkonma.

¹³Lɔnni suxu, i naxa a rabolo, i naxa a rabɛɲin, barima a findima simaya nan na i bɛ.

¹⁴I naxa bira mixi ɲaaxi fɔxɔ ra, i naxa mixi kobi xa kira suxu.

¹⁵I naxa ɲɛrɛ na xɔn, i naxa i makɔrɛ na ra. I kobe so na ra, i dangi.

¹⁶Mixi ɲaaxie mu nɔma xide e mu fe ɲaaxi raba. Xi xɔli mu nɔma e suxude e mu mixi ratantan.

¹⁷Fe ɲaaxi findixi e xa donse nun minse nan na.

¹⁸Tinxintɔɛ xa kira nɔrɔma nɛ, a yanbɛ naiyalanyi raminima nɛ alɔ soge.

¹⁹Kɔnɔ mixi ɲaaxie xa kira luxi nɛ alɔ dimi, e mu fe kolon naxan fama e rabirade.

²⁰N ma di, i i ɲɛngi sa n ma masenyi xɔn ma, i i tuli mati n ma marasi ra.

²¹E mato tɛmui birin, i e ragata i sondonyi kui,

²²barima e findima simaya nan na mixie bɛ, naxee e fahaamuma. E findima yalanyi nan na e fate bɛ.