Taalie 29:3-26

³Lɔnni rafan mixi naxan ma, na a baba rasɛɛwama nɛ, kɔnɔ naxan birama langoeɲa fɔxɔ ra, na ganma nɛ a harige ra.

⁴Mangɛ bɔxi rasabatima tinxinyi nan na, kɔnɔ mangɛ naxan kɔbiri fenma a yɛtɛ bɛ, na bɔxi xun nakanama nɛ.

⁵Mixi naxan a boore tamixiyama, a na yɛlɛ italafe a boore nan bɛ.

⁶Mixi ɲaaxi xa yunubi findixi gantanyi nan na a bɛ, kɔnɔ tinxintɔɛ xun nakelima nɛ sɛɛwɛ kui.

⁷Tinxintɔɛ katama nɛ tinxinyi xa raba setaree bɛ, kɔnɔ mixi ɲaaxi mu mɛɛnima setaree ma fefe ma.

⁸Mixi mayelee a niyama nɛ taakae xa xɔnɔ, kɔnɔ xaxilimae tan ɲama bɔɲɛ ragoroma nɛ.

⁹Xa kiiti lu xaxilima nun xaxilitare tagi, na xaxilitare sɔnxɔɛ ratema nɛ tun, bɔɲɛsa xa kana.

¹⁰Faxɛtie tinxintɔɛ xɔnma, kɔnɔ mixi tinxinxie e boore makantama nɛ.

¹¹Xaxilitare bɔɲɛ xa te mafura, kɔnɔ xaxilima tan a yɛtɛ suxuma nɛ.

¹²Mangɛ na bira wule fɔxɔ ra, a xa mixi birin findima nɛ mixi ɲaaxie ra.

¹³Fe keren na setare nun mixi kobi tagi: Alatala nan e birin daa.

¹⁴Mangɛ naxan setare makiitima nɔndi ra, na xa kibanyi mabanbanma nɛ abadan.

¹⁵Di xurufe luxusinyi ra, na a niyama nɛ a xaxili sɔtɔ, kɔnɔ di lufe a yɛtɛ yi ra, na findima yaagi nan na a nga bɛ.

¹⁶Mixi ɲaaxie na sɛnbɛ sɔtɔ, yunubie gboma nɛ, kɔnɔ tinxintɔɛe fama nɛ e xunnagore tode.

¹⁷I xa di matinxin alako i xa lu bɔɲɛsa kui, a ɲɛrɛ ki xa i rasɛɛwa.

¹⁸Xa ɲama mu Ala xa fe toma, e birama e yɛtɛ waxɔnfe nan tun fɔxɔ ra. Sɛɛwɛ na mixi bɛ naxan Ala xa sɛriyɛ rabatuma.

¹⁹Wɔyɛnyi xa mu konyi matinxinma. Hali a na mɛ, a mu a rabatuma.

²⁰Xaxilitare fisa mixi bɛ, naxan ɲɛngi mu sama a xa wɔyɛnyi xɔn ma.

²¹Konyi naxan kanyi bara a kana kabi a dimɛdi tɛmui, na findima tɔɔrɛ nan na a kanyi bɛ.

²²Bɔɲɛte nan gere raminima, a findi yunubie ra.

²³Yɛtɛ igboɲa mixi rayaagima nɛ, kɔnɔ yɛtɛ magore mixi xun nakelima nɛ.

²⁴Mixi naxan kafuma muɲɛti ma, na bara a yɛtɛ gan. A a kolon dankɛ na seede tinxintare bɛ, kɔnɔ a nɔndi nɔxunma nɛ.

²⁵Gaaxufe mixi ya ra, na findima gantanyi nan na, kɔnɔ naxan a yɛtɛ taxuma Alatala ra, a kisima nɛ.

²⁶Mixi gbegbe mangɛ xa hinnɛ fenma, kɔnɔ Alatala nan mixi birin makiitima nɔndi ra.