Taalie 28:1-17

¹Mixi ɲaaxie luma nɛ gaaxui kui, e e gima nɛ hali mixi mu e fɔxɔ ra. Tinxintɔɛe tan mu gaaxuma, e suusa alɔ yɛtɛ.

²Mangɛ die wuya ɲama matandila ya ma, kɔnɔ mangɛ xaxilima fata ɲama raxande.

³Setare naxan a boore setaree tɔɔrɔma, na maniya tunɛ wunde ra naxan xɛ kanama.

⁴Sɛriyɛ matandi mixi ɲaaxi matɔxɔma nɛ, sɛriyɛ rabatui tan xɔnɔma nɛ mixi kobi ma.

⁵Mixi ɲaaxie mu sɛriyɛ kolon, kɔnɔ Alatala fenmae a fahaamuma nɛ a fanyi ra.

⁶Setare tinxinxi fisa banna tinxintare bɛ.

⁷Sɛriyɛ batula findixi di xaxili fanyi nan na, kɔnɔ wasatare tan a baba rayaagima nɛ.

⁸Mixi naxan a xa naafuli xun masama riba ra, a xa bannaya gbilenma nɛ kinikininte ma.

⁹Mixi naxan tondima a tuli matide sɛriyɛ ra, Ala mu a xa duba suxuma feo.

¹⁰Mixi naxan tinxintɔɛe ratantanma, a birama a yɛtɛ kan xa gantanyi nan kui, tinxintɔɛ tan fa kɛ fanyi sɔtɔde.

¹¹Banna mixi ɲɔxɔ a ma a xa lɔnni gbo, kɔnɔ setare xaxilima nɔma nɛ na kanyi ra.

¹²Tinxintɔɛe xun na rakeli, ɲama ɲɛlɛxinma nɛ, kɔnɔ tinxintare xun na rakeli, ɲama a nɔxunma nɛ.

¹³Mixi naxan a xa yunubie nɔxunma, a xa fe mu sɔɔnɛyama, kɔnɔ mixi naxan a tima a xa yunubie ra, a gbilen e fɔxɔ ra, Ala kinikinima a ma.

¹⁴Sɛɛwɛ na mixi bɛ naxan gaaxuma Ala ya ra, kɔnɔ bɔɲɛ xɔrɔxɔɛ kanyi luma tɔɔrɛ nan kui.

¹⁵Mixi ɲaaxi naxan ɲama setare yamarima, a luxi nɛ alɔ yɛtɛ magaaxuxi nun wulai sube xaaɲɛ.

¹⁶Mangɛ xaxilitare mixi tɔɔrɔma nɛ, kɔnɔ mangɛ naxan naafuli tinxintare xɔnma, na simaya xɔnkuye sɔtɔma nɛ.

¹⁷Mixi naxan a kolon a bɔɲɛ kui a faxɛ tixi, na luma a gi ra nɛ han aligiyama. Mixi yo naxa na kanyi mali.