Taalie 25:3-18

³Koore xa maiteya nun bɔxi xa tilinyi mu kolonma. Mangɛ sondon ma fe fan mu nɔma kolonde.

⁴Xa gbeti gbi ba, a nɔma findide se tofanyi ra.

⁵Xa mixi ɲaaxi ba mangɛ rabilinyi, a xa mangɛya sabatima nɛ tinxinyi saabui ra.

⁶I naxa i yɛtɛ igbo mangɛ ya xɔri, i naxa i yɛtɛ findi mixi xungbe ra.

⁷A fisa kuntigi nan xa i xili i xa dɔxɔ yire nde, dinɛ a xa i rakeli mixi xungbe nde bɛ.

⁸I na fe nde to, i naxa gbata sigafe ra kiiti banxi, barima xa fe gbɛtɛ minima i mu naxan kolon, na nɔma i rayaagide i dɔxɔboore ya xɔri.

⁹Fe na so wo nun i dɔxɔboore tagi, i naxa mixi gbɛtɛ xa gundo makɛnɛn,

¹⁰xa na mu a ra mixi nde na na kolon, a i rayaagima nɛ, i fa xili kanɛ sɔtɔ abadan.

¹¹Wɔyɛnyi falaxi a ki ma, a tofan alɔ xɛɛma nun gbeti.

¹²Xaxilima xa marasi tide gbo xaxili fenyi bɛ, alɔ xurundɛ naxan yailanxi xɛɛma fanyi ra.

¹³Dugutɛgɛ xɛɛra ɲɔxun a xɛɛma bɛ, alɔ foye fanyi naxan fama walikɛe ma xɛ xaba tɛmui.

¹⁴Mixi naxan a falama a setaree kima, kɔnɔ a mu a rabama, na kanyi luxi nɛ alɔ nuxui nun foye naxan mu fama ye ra.

¹⁵Tunnabɛxiya a niyama nɛ mangɛ xa natɛ masara, wɔyɛn ɲɔxunmɛ sɛnbɛ gbo han a nɔma xɔri ragirade.

¹⁶I na kumi to, naxan i ralima, na nan kɔn. Xa a radangi yɛ, i a bɔxunma nɛ.

¹⁷I naxa i dɔxɔboore xɔnyi sigafe radigan, xa na mu a ra i xa fe fama nɛ raɲaaxude a ma.

¹⁸I dɔxɔboore tɔɔɲɛgɛfe xɔnɔ alɔ santidɛgɛma xaaɲɛxi, alɔ tanbɛ rameluxi.