Taalie 11:11-27

¹¹Tinxintɔɛe munafanyi rafama nɛ a xa taa ma, mixi ɲaaxie tan taa xun nakanama e xa wɔyɛnyie nan na.

¹²Lɔnnitare yoma nɛ a boore ma, lɔnnila tan luma sabari nan kui.

¹³Naafixi gundo makɛnɛnma nɛ, dugutɛgɛ tan a suturama nɛ.

¹⁴Marasitareɲa ɲama rabirama nɛ, kɔnɔ marasima wuyaxi tan findima kisi nan na e bɛ.

¹⁵Mixi yo taani mixi bɛ fe nde ma, a fama nɛ nimisade. Tondife na rabade, na nan fisa.

¹⁶Ginɛ fanyie binyɛ sɔtɔma nɛ, kɔnɔ xɛmɛ ɲaaxi naafuli nan tun sɔtɔma.

¹⁷Xɛmɛ fanyi ɲɛrɛ ki a malima nɛ, kɔnɔ xɛmɛ ɲaaxi tɔɔrɛ nan bɛndunma a yɛtɛ ma.

¹⁸Mixi ɲaaxi xa geeni fama nɛ a madaxude. Tinxintɔɛ tan xa geeni findima sare fanyi nan na a bɛ.

¹⁹Tinxintɔɛ kisima nɛ, kɔnɔ tinxintare faxɛ nan sɔtɔma.

²⁰Bɔɲɛ ɲaaxi mu rafan Alatala ma, a wama tinxinyi nan xɔn.

²¹Mixi ɲaaxi fama nɛ fe ɲaaxi sɔtɔde, kɔnɔ tinxintɔɛ tan kisima nɛ.

²²Ginɛ tofanyi xaxilitare luma nɛ alɔ xurundɛ xɛɛma daaxi xɔsɛ ɲɔɛ ra.

²³Tinxintɔɛ fama nɛ fe fanyi sɔtɔde, kɔnɔ xɔnɛ nan luma mixi ɲaaxi tan bɛ.

²⁴Mixi naxan bɛlɛxɛ yelefu ki tide, a bannaya sɔtɔma nɛ, kɔnɔ mixi kumaxi tan findima setare nan na.

²⁵Mixi naxan a harige itaxunma, a fama nɛ harige sɔtɔde. Ye xɔli mu luma mixi ma naxan a boore kima ye ra.

²⁶Ɲama mixi dankama nɛ naxan tondima baloe matide, e dubama nɛ mixi bɛ naxan tinma ɲama xa nde sɔtɔ.

²⁷Fe fanyi rabae, fe fanyi sɔtɔma nɛ, kɔnɔ fe ɲaaxi rabae, fe ɲaaxi nan sɔtɔma.