Taalie 10:2-21

²Harige sɔtɔ ki ɲaaxi mu sese gasama mixi ma, kɔnɔ tinxinyi nan simaya fima mixi ma.

³Alatala mu mixi tinxinxi luma kaamɛ ra, kɔnɔ a tondima nɛ mixi ɲaaxi waxɔnfe ra.

⁴Bɛlɛxɛ walitare setareɲa nan bɛndunma mixi ma, bɛlɛxɛ wakilixi bannaya nan fima mixi ma.

⁵Di naxan wakilima xɛ xaba tɛmui a findixi xaxilima nan na, kɔnɔ di naxan xima xɛ xaba tɛmui a findixi yaagi nan na a baba bɛ.

⁶Barakɛ na mixi tinxinxi fɔxɔ ra, gbaloe bira nɛ tinxintaree fɔxɔ ra.

⁷Tinxintɔɛ xili findima duba nan na, kɔnɔ mixi ɲaaxi xili lɔɛma nɛ.

⁸Lɔnnila tinma lude sɛriyɛ bun ma, kɔnɔ lɔnnitare xa wɔyɛnyi a xun nakanama nɛ.

⁹Mixi naxan ɲɛrɛma nɔndi ra, a ɲɛrɛma kantari nan kui, kɔnɔ mixi naxan mu a ɲɛrɛma tinxinyi ra, na tan fama rayarabide nɛ.

¹⁰Mixi naxan nɔndi nɔxunma a booree ma, a e tɔɔrɔfe nɛ. Dɛ kanyi xaxilitare a xun nakanama nɛ.

¹¹Wɔyɛnyi tinxinxi tinxintɔɛ xa simaya xɔn kuyama nɛ, kɔnɔ mixi ɲaaxi tan dɛ gbaloe raminima nɛ.

¹²Gbɛsɛnxɔnnɛya gere rakelima nɛ, kɔnɔ marafanyi diɲɛma nɛ fe kanaxi birin ma.

¹³Lɔnni nan na xaxilima nɛnyi bun ma, kɔnɔ gbendegela nan sinma xaxilitare fari ma.

¹⁴Fe kolonyi ragataxi lɔnnilae yi ra, kɔnɔ lɔnnitare xa wɔyɛnyi fe nan tun kanama.

¹⁵Banna mixi harige findixi a kanta se nan na, kɔnɔ setareɲa nan misikiinɛ xun nakanama.

¹⁶Tinxintɔɛ xa geeni findixi simaya nan na, mixi ɲaaxi sare findixi ɲaxankatɛ nan na.

¹⁷Mixi naxan xurui fahaamuma, a tixi simaya kira nan xɔn, kɔnɔ naxan mɛɛma na marasi ra, a bɔnɔma nɛ.

¹⁸Wule falɛ gbɛsɛnxɔnnɛya ragatama nɛ, xaxilitare nan mixi tɔɔɲɛgɛma.

¹⁹Wɔyɛnyi rawuyafe nɔma mixi findide yunubitɔɛ ra, kɔnɔ xaxilima tan a dɛ suxuma nɛ.

²⁰Tinxintɔɛ xa wɔyɛnyi tide gbo gbeti bɛ, kɔnɔ mixi ɲaaxi bɔɲɛ tide xurun.

²¹Tinxintɔɛ xa marasi mixi raɲɛrɛma nɛ, kɔnɔ xaxilitare faxama lɔnnitareɲa nan kui.