Taalie 10:18-32

¹⁸Wule falɛ gbɛsɛnxɔnnɛya ragatama nɛ, xaxilitare nan mixi tɔɔɲɛgɛma.

¹⁹Wɔyɛnyi rawuyafe nɔma mixi findide yunubitɔɛ ra, kɔnɔ xaxilima tan a dɛ suxuma nɛ.

²⁰Tinxintɔɛ xa wɔyɛnyi tide gbo gbeti bɛ, kɔnɔ mixi ɲaaxi bɔɲɛ tide xurun.

²¹Tinxintɔɛ xa marasi mixi raɲɛrɛma nɛ, kɔnɔ xaxilitare faxama lɔnnitareɲa nan kui.

²²Alatala xa barakɛ nan mixi bannama, mixi sɛnbɛ mu sese sama na fari.

²³Fe ɲaaxi rafan mixi kobi ma, kɔnɔ lɔnni rafan xaxilima ma.

²⁴Mixi ɲaaxi hɛnmɛma fe naxan na, na nan a lima. Mixi tinxinxi waxɔnfe, Ala nan na nabama a bɛ.

²⁵Fe xɔrɔxɔɛ na fa, mixi ɲaaxi yo mu tima, kɔnɔ tinxintɔɛ tan tima nɛ abadan.

²⁶Muluxunyi fe naxan niyama mixi ɲinyi ra, tuuri fe naxan niyama mixi ya ra, tunnaxɔnɛ fan na nan niyama a xɛɛma ra.

²⁷Alatala xa yaragaaxui simaya nan fima mixi ma, kɔnɔ mixi ɲaaxie xa simaya xɔn mu kuya.

²⁸Mixi tinxinxie xa tina findima e bɛ sɛɛwɛ nan na, kɔnɔ mixi ɲaaxie xa tina findima e bɛ tɔɔrɛ nan na.

²⁹Alatala xa kira findixi kantari nan na mixi tinxinxie bɛ, kɔnɔ a findixi halaki nan na tinxintaree bɛ.

³⁰Tinxintɔɛ mu birama fefe ma, kɔnɔ mixi ɲaaxi mu luma bɔxi ma.

³¹Mixi tinxinxi dɛ lɔnni nan masenma, kɔnɔ wule falɛ nɛnyi bolonma nɛ.

³²Tinxintɔɛ dɛ fe fanyi nan falama, kɔnɔ mixi ɲaaxi fe ɲaaxi nan falama.