Tɛnɛ Faalaaliiti 8:10-36

Click on verse(s) to share them!

¹⁰Nà-kalagi gè bosu ga woye, à naa wɔin ɠɛ, é leʋe walii ʋa, faaɠwɛgi vizɔgɛ zanugi ʋa, anɛɛ zanu kitei.

¹¹Mazɔlɔɔ ɠimalai vizɔgɛ kɔbu yɔlɔɠɔ ʋagɔiti ba, ani ʋagɔ nɔpɛ ge la zooga ʋokɔɠɔsu tɔun ma.

¹²Nɔ̀un nà, nà ga ɠimalai, sèizuʋɛ ɠa ga kidafaawui, sòogɛ faaɠwɛgi ta kidafaawui zɔlɔɔsu.

¹³Ɠɔoɠɔ GALAGI ɠaazuluabai ɠa é ga, è zili ga faa ɲɔi. Niiti gè ti wɔinzeɠezu, ta ga, gaazulɛɛi, wasogi, faa ɲɔu ʋelei, ta zɛɛ wo daaʋɛ.

¹⁴Tɛnɛ goo ʋagɔiti, ta kidafaawui ta ga nɔ̀nɔ, nà ɠa gè ga keleɠelegi, zobogi ɠa ga nɔ̀nɔ.

¹⁵Masagiti ta masadai ɠɛɛzu nɔ̀un saɓui zu, kundiɠiiti ti tɔgiti sei, niiti ti zɔlegai.

¹⁶Saɓui zu ɠa kundiɠiiti ti kundiɠilai ɠɛɛzu la, ta seizumaanɛɛgiti ti pɛ ta ga tukpɔɠaaleʋe nuiti ti zɔlegai.

¹⁷Nɔ̀un nà, naati kpein nɛɛʋɛ bɛ̀, niiti ti nɛ̀ɛzu ʋɛ, niiti ti gàiziɛzu, naati ta pɛ̀tɛ.

¹⁸Naavoloi ta lɛbiyai ta ga nɔ̀un nɔnɔ, ta undaanɛɛi ta ani ʋagɔiti ti yɛsu ná ɠɔ.

¹⁹Nà-tɔnɔgi vizɔgɛ, é leʋe zanugi ʋa, anɛɛ zanu kitei, kulanumai gè feezu naa ɓaaɠoʋɛ walii ʋa.

²⁰Nà ziɛzu telebo pelei zu, pìlɛgɛ sɔle peleiti ba,

²¹gè ʋa ani ʋagɔi ve naati bɛ, niiti ti nɛ̀ai ʋɛ, gè ta-ʋɛlɛiti buulaave ga naavoloi.

²²Gè ɠɛni Ɠɔoɠɔ GALAGI ya, kaite ná-botiiti tɔɔzeizuʋɛ, aisa ná-boti mɔungiti tanɔpɛ ge ʋa ɠɛ.

²³Gè zeini kaite wɔlɔwɔlɔ, aisa eteai ʋa ɓɛtɛ.

²⁴Siɛgi zu gè zɔlɔɔni da, kpoloɗɛi la ɠɛni dɛ ná, ɓaa ziɛungiti, ziɛiti ti ʋa ɗa ɠula ti zu.

²⁵Gè zɔlɔɔni pɛ, aisa gizeiti ti ʋa ɓɛtɛ, aisa gize ɓufɛgiti ti ʋa ɠula,

²⁶GALA ge la ɠɛni dɛ zooi ɓɛtɛni, ta zou yɔɠɔzuʋɛti, anɛɛ eteai ma vufili mɔungi.

²⁷Gè ɠɛni ná niina, siɛgi zu é geeɠɔlɔgi zeini su la, é kwɛgi la, é tati ziɛ wolai ma.

²⁸Siɛgi zu é tonaɓiingiti seini su la geezuʋɛ, é zɛbɛi ve ziɛungiti bɛ, ti ɗa ɠula ga keeɠaaɓaai.

²⁹Siɛgi zu é kpoloɗɛi ɠwɛgi laani la, ziɛiti ti mina ɓudɛ maazu, siɛgi zu é eteai ma wuulaagi ɠazaʋini da,

³⁰gè ɠɛni koba, eɠɛ ná-botiɠɛ ɠundiɠi, gè ɠɛni ziilaazu folo-o-folo, gè ɠɛni kuai wosu gaazu yeenɔpɛ,

³¹gè ɗa kuai wo ná-etea ɓɛtɛai zu, gè ɗa nà-ziilaai zɔlɔɔ nuɓusɛiti saama.

³²Niizu dòun zunuiti, à woilo gòoi ma, wa ɠɛ ga undaanɛɛ nuiti, ni wa ziɛna ga nà-peleiti!

³³À woilo nà-kala gooiti ma, wa ɠɛ ga ɠima nuiti. À mina da ɠoba pɛ!

³⁴Undaanɛɛ nu ɠa ga naati, niiti ti woilosu gòo ma, niiti ti losu nà-pɛlɛlaʋɛ folo-o-folo, ti ɠaaɓaazu nà-pɛlɛlaʋɛ ma!

³⁵Mazɔlɔɔ zɔi a kà, naa zɛnvui zɔlɔɔga, é Ɠɔoɠɔ GALAGI ná-kpɔbai zɔlɔɔga.

³⁶Kɛlɛ zɔi nɔpɛ é la ɠoloni bɛ̀, naa ɠa ɓɔɠɔ ɓɔlɔzu, niiti kpein ti wɔ̀inzeɠezu, saai nɛɛʋɛ naati bɛ.»