Tɛnɛ Faalaaliiti 8:1-24

Click on verse(s) to share them!

¹À woilo, ɠimalai ɠa toligi wosu, keleɠelegi ɠa wooɠulazu.

²Toɠa loni ada ɠaaɠoozagiti maazuʋɛ pele ɠobaʋɛ, pele zaɠalaʋɛti.

³Taa loaʋɛ, siɠi daaʋɛti, nu lɛɛzuʋɛ taazuʋɛ, toɠa wooɠulazu:

⁴«Nuiti, wa ɠa gè wooɠulazu wo ma, nuɓusɛiti, wa ɠa gè ɓɔɛzu wo ʋɔ.

⁵Wɔiti wo la dɛ faa mɔinmɔin kwɛɛni, à kidafaawui maaɠɔli, faaɠaaɠaalala nuiti, à ɠɛ ga keleɠele nuiti.

⁶À woilo dɛɛ, mazɔlɔɔ faa ɓiin ka gè bosu wo ma, telebo kpɔɛiti ka ti ɠulazu dàaʋɛ.

⁷Mazɔlɔɔ gaama ɓɔɛiti ka gè ti wosu, màaɲɛɛi ɠa ga zɛɛ ɓɔɛiti.

⁸Dàawooiti kpein sɔlegɛ, tanɔpɛ su la zeini, ɓaa é ʋa ɠɛ ga zɛɛ ɓɔɛ, ɓaa yaava ɓɔɛ.

⁹Ti pɛ gaaɠalagɛ naama nui ʋɛ, nii keleɠelegai, ti ɠole naama nui ʋɛ, nii kalagai.

¹⁰Nà-kalagi gè bosu ga woye, à naa wɔin ɠɛ, é leʋe walii ʋa, faaɠwɛgi vizɔgɛ zanugi ʋa, anɛɛ zanu kitei.

¹¹Mazɔlɔɔ ɠimalai vizɔgɛ kɔbu yɔlɔɠɔ ʋagɔiti ba, ani ʋagɔ nɔpɛ ge la zooga ʋokɔɠɔsu tɔun ma.

¹²Nɔ̀un nà, nà ga ɠimalai, sèizuʋɛ ɠa ga kidafaawui, sòogɛ faaɠwɛgi ta kidafaawui zɔlɔɔsu.

¹³Ɠɔoɠɔ GALAGI ɠaazuluabai ɠa é ga, è zili ga faa ɲɔi. Niiti gè ti wɔinzeɠezu, ta ga, gaazulɛɛi, wasogi, faa ɲɔu ʋelei, ta zɛɛ wo daaʋɛ.

¹⁴Tɛnɛ goo ʋagɔiti, ta kidafaawui ta ga nɔ̀nɔ, nà ɠa gè ga keleɠelegi, zobogi ɠa ga nɔ̀nɔ.

¹⁵Masagiti ta masadai ɠɛɛzu nɔ̀un saɓui zu, kundiɠiiti ti tɔgiti sei, niiti ti zɔlegai.

¹⁶Saɓui zu ɠa kundiɠiiti ti kundiɠilai ɠɛɛzu la, ta seizumaanɛɛgiti ti pɛ ta ga tukpɔɠaaleʋe nuiti ti zɔlegai.

¹⁷Nɔ̀un nà, naati kpein nɛɛʋɛ bɛ̀, niiti ti nɛ̀ɛzu ʋɛ, niiti ti gàiziɛzu, naati ta pɛ̀tɛ.

¹⁸Naavoloi ta lɛbiyai ta ga nɔ̀un nɔnɔ, ta undaanɛɛi ta ani ʋagɔiti ti yɛsu ná ɠɔ.

¹⁹Nà-tɔnɔgi vizɔgɛ, é leʋe zanugi ʋa, anɛɛ zanu kitei, kulanumai gè feezu naa ɓaaɠoʋɛ walii ʋa.

²⁰Nà ziɛzu telebo pelei zu, pìlɛgɛ sɔle peleiti ba,

²¹gè ʋa ani ʋagɔi ve naati bɛ, niiti ti nɛ̀ai ʋɛ, gè ta-ʋɛlɛiti buulaave ga naavoloi.

²²Gè ɠɛni Ɠɔoɠɔ GALAGI ya, kaite ná-botiiti tɔɔzeizuʋɛ, aisa ná-boti mɔungiti tanɔpɛ ge ʋa ɠɛ.

²³Gè zeini kaite wɔlɔwɔlɔ, aisa eteai ʋa ɓɛtɛ.

²⁴Siɛgi zu gè zɔlɔɔni da, kpoloɗɛi la ɠɛni dɛ ná, ɓaa ziɛungiti, ziɛiti ti ʋa ɗa ɠula ti zu.