Tɛnɛ Faalaaliiti 7:1-14

¹Dòun zunu, mina yeema dàawooiti ma, nà-deveiti makɛ.

²Ni ɗa pɔ è zɛnvui wo, nà-deveiti so, è makɛ nà-kala gooiti ma, eɠɛ è-ɠaazuleegi.

³Ti lɔ yeeɓeɠaiti ba, eɠɛ balaɠaegiti, ti zɛʋɛ yiimaʋɛ.

⁴Ɠimalai leve ga è-ʋaazeelai, è keleɠelegi leve ga è-wɔɔlai,

⁵ga ti è ɠizo wɛɛnziɛ anzanui ma, ta è-zeiɲɔɠɔi anzai ná-tɛga ɓɔɛ nɛɛnɛgiti ma.

⁶Foloi ta, gè ɠɛni loni nà-fenɛtɛlɛi laaʋɛ, gè ɗa wɛlɛ eteaʋɛ.

⁷Gè buzeɠe niinɛgiti kaani, ti la dɛ faa pɛ poluɠwɛɛ, ti zaama, zunu loungoi ta ɠɛni ná, balagai ɠigi ma.

⁸É ɠɛni ziɛzu taazuʋɛ pelei zu, adaʋɛ tɔna ʋɛ naama anzanui ta ɠɛni loni ná, é liini ga naa ná-pɛlɛi ʋɔ pelei.

⁹É ɠɛni ga fitili pɛɛzuʋɛ, foloi liini niina, kpidii tɔɔzeini niina ga ʋɛa.

¹⁰Kɛlɛ wɛlɛ, anzanui daaɠomini, maaɠiliai eɠɛ koloɠolo anzanu, yaava ɠigi bɛ.

¹¹É ɗa zɔngɔ, su la zoga, kɔɠɔiti ti la yɛga loni kpɛ ada ɠila.

¹²Taa zaamaʋɛ ʋeleiti su, ta ada wolaiti, adaʋɛ pɛ ka é ná-balii laazu ná.

¹³É zunu loungoi zo, é nɛɛnɛ, é ɠaazulo gaazuʋɛ ʋa, é ɠɛ ma:

¹⁴«Ziilɛi zalaɠaiti ka gè ɠɛa ti ɠulazu, za nɔ ɠa gè nà-minazeɠegi laazeeliai la.