Tɛnɛ Faalaaliiti 6:20-33

²⁰Dòun zunu, ɠizɛ è-ɠɛɛ ná-deveiti su, mina è-lee ná-tɛnɛ gooiti too ya!

²¹Makɛ ti ma yeenɔpɛ è-yiimaʋɛ, ti zɛlɛ ɠɔbu.

²²Ta lo è luɠɔ ɗa-ziɛi zu, ti è makɛ è-laazuʋɛ, ti yɛpɛ è ʋɔ, ɗa wuunna.

²³Mazɔlɔɔ devei ɠa ga lanboi, kalagi ɠɛ ga wozakalagi, zelilogi ta maaɠoloi, ta ga pelei é lo zɛnvui ʋa.

²⁴Ta è makɛ wɛɛnziɛ anzanui ziɛ ʋelei ma, ta è-zeiɲɔɠɔi anzai ná-kpɔɛ nɛɛnɛgi ma.

²⁵Mina ɠaazuɠula ná-pagi ʋa è-yiimaʋɛ, mina ɓɔɠɔ yɛ ná, é ʋa è zeɠe ga gaazuɠɔlɔgiti.

²⁶Mazɔlɔɔ koloɠolo anzanui maaʋele ma, ɗa ʋala ɗa-ɓulu ɓuɠai nɔ ma, kɛlɛ anzanui é zini bɛ, ɗa ɠɛ è ʋala è-yɛnvui pɛ ma.

²⁷Nu ɠa zoo nɛi é abui lɔ ná-zuvai zu, é la ná-seɠeiti kpein gala ɓaa?

²⁸Nu ɠa zoo nɛi é ziɛ abulekai ɠa, é la kɔɠɔiti gala ɓaa?

²⁹Zenɔ ɠana é la, ga naama nui nii é ʋilɛsu seiɲɔɠɔi anzai ʋolu, a vɔɔɠuna ba, salalalai la yɛga.

³⁰Nu la unma nui ʋɛlɛʋiliga, nii é unmai wosu ga é kogi zulaave, tɔɔzei ani la zea, nii a mi.

³¹Anɛɛ naa ʋe, ni ta sona, maanɛɛʋɛ é potogi ve ga seizu lɔfela, ani ʋagɔi kpein é ná-pɛlɛi wu, toɠa naa pɛ fe.

³²Kɛlɛ zɔi é wɛɛnziɛgi ɠɛɛzu anzanui ʋɔ, naa ʋalagɛ faaɠaaɠai ma, ɗa naa ɠɛɛna, ɗa ɓɔɠɔ ɠoloɠolosu, ɗa ɓɔɠɔi.

³³Toɠa kpɔlɔi zɔlɔɔ ta ɓaaɠulamai, ná-unfegi la ɓega eyɛsu ɠɔ.