Tɛnɛ Faalaaliiti 5:4-22

⁴Kɛlɛ ná-fai ɠaaɓelazuʋɛ ɠaa ɠa ɗa wana ga nu, eɠɛ siinziin ganigi, nii wanaai, gaaliʋɛ eɠɛ boɠa zɔkpɔi, nii gaaʋɛɛ fele.

⁵Siɛ ʋelei ɠa ɗa li ga nui saai ʋɔ pelei, kɔɠɔiti ta ɗa zeeli gɔvɛalaazu.

⁶É la ɗa ga yiizoolɛ ga, é ziɛ ga zɛnvu ʋelei, é la suɠwɛɛ ga toɠa ziɛzu ga kaka peleiti.

⁷Niizu deɠɛmu, dòun zunu, woilo gòoi ma, mina ɠɛlɛ dàawooiti ba,

⁸Maaɠooza naama anzanui ma zii ʋa, mina maaɓuɠa ná-pɛlɛlaʋɛ ʋa,

⁹naa ɠa a kɛ, è mina è ɠaazu unfegi lɔ zunu ɠili zeezu, ɗa-eteai mina lɔ zunu ɲɔu yeezu.

¹⁰Ni naa laade, è-moolɛzuʋɛ ɠa ɠɛ ga wɛɛinti daamiizu, ɗa-wotii zulɔnɔgi ɠa ɠɛ ga pɛlɛ ɠili bu ani,

¹¹naa ɠa a kɛ, è mina li ɓalasu, ɗa-eteai ɠaaɓelazuʋɛ, siɛgi zu è-ɓusɛi kpein suyɔkɔgai na la,

¹²è mina ɠɛ ma: «Leeni vaa zu gè maaɠoloi wɔinzeɠeni? Leeni vaa zu tɛnɛgi la ɠɛni zoni zìi ma?

¹³Leeni vaa zu gè la ɠɛni woiloni nà-kalamɔinti gooiti ma? Gè la woiloni naati gooi ma, niiti ti kàlani?

¹⁴Ná tago nɔ, gè ʋa ɠɛ maanɔɠɔi zu, nuɓusɛiti ta-maaɓɔgi zaama.»

¹⁵È-anzai ɠɛɛʋɛ eɠɛ zeɠe ɗɛi. Ɓɔɔle ga zeɠe ɗɛi naa!

¹⁶Mina è yiima vai yɛ ná, é ʋa ɗa yei taazuʋɛ peleiti su, eɠɛ ziɛi, é ʋa ɗa vaza maaɓɔ bosu wolaiti.

¹⁷È yiima vaiti ti ɠɛ ga ɗa ɠila kpe nɔ ɗɔnɔ! Ti mina ɠɛ ga wo ɓɔma wa anzanu ɠiligiti.

¹⁸Ɠoozunɛ yeenɔpɛ su, wo eteai ziɛ ʋɔ, wa anzanui naa, nii è yiimazeɠeni la, è-ma nu niinɛlai zu.

¹⁹È-anzai ná-fai ɠaanɛɛʋɛ, ná-fai ʋagɛ eɠɛ dopai. Kpusɛi ɗa-ɠoozunɛɛi laazeeli yeenɔpɛ. Ɠoozunɛ siɛnɔpɛ su ná-nɛɛbɛi zu.

²⁰Dòun zunu, leeni vaa zu è ɠaazuɠulazu nu ɠili anza ʋa? Leeni vaa zu ɗa ziilɛi gaiziɛ naama anzanui ya, nii é la ga ɗɔnɔ?

²¹Ɠɔoɠɔ GALAGI ɠa nui kpein siɛ ʋelei zumɔsu. Toɠa ɛsɛ kɛɛwotii ʋɛtɛsu.

²²Faa ɲɔu ɠɛ nui ɠa ɗa zo, tɔ ɓɔɠɔi ná-faaɠaaza golai nɔ zu, toɠa ɗa zo, ga tɔ ɓɔɠɔi ná-kotoi ʋa ɠaluiti nɔ.