Tɛnɛ Faalaaliiti 4:3-22

³Gè ɠɛni kɛ̀ɛ ya, ga doun zunu ɠilagi, dèe nɛ̀ɛni ʋɛ gola, eɠɛ doun zunu ɠila kpegi.

⁴Kɛ̀ɛ ɠɛni kàlasu, é ɗa ɠɛ mà: «Dàawooiti so ga è-yii pɛ, nà-deveiti so, ɗa zɛnvui wo.

⁵Ɠimalai ɠaiziɛ, ta keleɠelegi, mina yeema dàawooiti ma, mina zeɠe ti ʋa.

⁶Mina ɠɛlɛ ɠimalai ʋa, toɠa ɓɔ è ʋa, nɛɛ ʋɛ, toɠa ɓaa è maazu.

⁷Wɛlɛ ɠimalai lɔɔzeigi ʋa: Ɠimalai ɠaiziɛ, keleɠelegi ɠaiziɛ ga è zɔlɔɔ ganii kpein.

⁸Bɔɔlɔ, toɠa è wuzeɠe, ni ɗa ɠilina ba, toɠa ɠɛ ga lɛbiya è ʋɛ.

⁹Toɠa bɔɔlɔ pagɔi lɔ è unba, é è maaɠili ga masa bɔɔlɔ maayikiai.»

¹⁰Woilo dòun zunu, dàawooiti gaaɠa, naazu, ɗa è-zii zuɠooza.

¹¹Gè è ɠalagɛ ga ɠimalai ma ʋelei, gè lo è luɠɔ telebo peleiti su.

¹²Ni ɗa ɠɛna ziaa ɠana, è-ɠɔɠɔ zu la ɠataga, ni ɗa ɠɛna ɓizaa, è-ɠɔɠɔi la ziɠaa.

¹³Ɠili kpaan è maaɠolo vai ʋa, nii è sɔlɔɔgai, mina too ya, yɛ ɠilini ba, mazɔlɔɔ naa ɠa è-yɛnvui su.

¹⁴Mina ziɛ ga nu ɲɔiti ta-ʋelei, mina ʋilɛ naati kɛʋelei ʋolu, niiti ti faa ɲɔi ɠɛɛzu.

¹⁵Maaɠooza ta-ʋelei ʋa, mina ziɛ la, zeɠe ba, è ziɛ yɛ.

¹⁶Mazɔlɔɔ faa ɲɔu ɠɛ nui naati, ti la ɲia, ni ti la faa ɲɔi ɠɛɛni, ta ʋala ɲiimɛnii ma, ni ti la nui ta looni.

¹⁷Mazɔlɔɔ ti-ɠɔnɔgi ɠa ga faa ɲɔi, ta-ɓɔɔle lɔɔi ɠa ga suɲɔulai.

¹⁸Telebo nuiti ta-ʋelei ɠɛɛʋɛ eɠɛ, geelaalaosu wozakalagi, nii ma wozakalagi ɠaa yɛsu wɔɔlɔzu, eyɛsu foloi tɛ.

¹⁹Faa ɲɔu ɠɛ nuiti ta-ʋelei ɠɛɛʋɛ eɠɛ kpidii, ti la ti ɠɔɠɔziɠa ani ɠwɛɛ.

²⁰Dòun zunu, woilo dàawooiti ma, woilo ga pagɔ kpɔ̀ɛ wooiti ma.

²¹Mina yeema ti ma, kɛlɛ makɛ ti ma è-yiimaʋɛ.

²²Mazɔlɔɔ niiti ti yeezeizu ti wu, ta ʋa ga zɛnvui naati pɔ, ti kɛdɛyai ve ti-ɓusɛi ya.