Tɛnɛ Faalaaliiti 3:8-26

⁸Toɠa ɠɛ ga kɛdɛyai è-ɓusɛi ʋɛ, ta è-ɠaeiti niinɛ vai.

⁹Ɠɔoɠɔ GALAGI lɛbi, ga è zɔlɔɔ gani ʋagɔiti, ta è zɔlɔɔ ganii ma mɔungiti kpein.

¹⁰Naazu, ɗa-molo ɠotaiti daa ɠa ve gola, ɗa-lɔɔ liɠiiti daa ɠa ve ga dɔɔ niinɛiti.

¹¹Dòun zunu, mina ɠɛlɛ Ɠɔoɠɔ GALAGI ná-maaɠoloi ʋa, mina ná-zelilomai ʋɛlɛʋɛlɛ.

¹²Mazɔlɔɔ nii Ɠɔoɠɔ GALAGI nɛai ʋɛ, naa ɠa a ɗa zelii lo ma, eɠɛʋelei doun kɛɛɠɛi a ɗa kɛ la ná-doun zunui ʋɛ, nii nɛai bɛ.

¹³Undaanɛɛ nu ɠa ga naama zunui, nii é ɠigi zɔlɔɔgai, zunui nii é ga kidafaawu nui!

¹⁴Mazɔlɔɔ kulanumai é sɔlɔɔsu, naa vizɔgɛ walii nɔnɔi ʋa, ná-tɔnɔgi vizɔgɛ zanu kitei ʋa.

¹⁵Fizɔgɛ é leʋe kɔtu zɔngɔ ɓaagi pɛ ba, è yiima anii tanɔpɛ ge la vizɔga ga tɔun kɛʋele.

¹⁶Sii zuɠoozai ɠa ɠimalai yeezai ɠa, kɔʋɛi ɠa, naavoloi ta lɛbiyai ɠa é miná.

¹⁷Peleiti é nu ʋilɛsu ti ʋa, naati pagɛ, ná-peleiti kpein ta ɠomisu undaanɛɛi ʋɔ bɛ.

¹⁸Toɠa ga zɛnvu wului naati bɛ, niiti ti sosu kpe, niiti ti makɛsu ma, naati undaanɛɛʋɛ.

¹⁹Ɠɔoɠɔ GALAGI ná-ɠimalai ɠa é zooi ɓɛtɛni la, ná-keleɠelegi ɠa é geeɠɔlɔgi ɓɛtɛni la.

²⁰Ná-ɠimalai ʋɔ, zou wu ɗɛiti kulaʋɛ, ti la zooi ma, tonaɓiingiti ti ɗa tonai ʋu.

²¹Dòun zunu, ɠili keleɠelegi ʋa, ta kidafaawui, mina zeɠe ti ʋolu eyɛsu ɠɔ.

²²Mazɔlɔɔ ta ɠɛ ga zɛnvu ʋagɔi è ya, ɗa ɠɛ naazu ga zaalamai.

²³Naazu, è-ɠi su ɠa ɠala, è ɗa li ga lii ʋele, è-ɠɔɠɔi la ziɠaa.

²⁴Ni ɗa laana, maaɠili la ɠɛa è ma, ɗa-ɲiimɛnii ɠaaɠaanɛ.

²⁵È la luaa kulafiliba vaaɓa ba, ɓaa faa zuɠoloɠologi nii a zei nu ɲɔiti ma.

²⁶Mazɔlɔɔ Ɠɔoɠɔ GALAGI ɠa ɠɛ ga ɗa-ɠitogi, toɠa balii kpein seɠe è luɠɔ.