Tɛnɛ Faalaaliiti 29:6-26

⁶Faa ɲɔu ɠɛ nuiti ta ɗa ɠɛ ga kasoɠa nui, tiya ɓɔɠɔi ta-lɔ koloɠologiti faa zu, sɔle nuiti ta ɗa pilɛ sɔlɔɔ, ti ɠoozunɛ.

⁷Telebo nui naa ɠwɛɛ, nii maanɛai é ɠɛ bala nuiti bɛ, kɛlɛ naama ɠi ge la faa ɲɔu ɠɛ nui ma.

⁸Ɲɛɛɠulasu nuiti ta ɗa kpɔɛ abui ʋili taa wolai zu, kɛlɛ ɠima nuiti ta ɗa ziiɠaawanai ɠaayei.

⁹Ni ɠima nui ta ɠimalala nui ta ɠɛna tukpɔi ma, ɠimalala nui yiiɠaawanaʋa, ɓaa é ɲɛɛi wo, é la ɓɔlɔa.

¹⁰Ɲama ʋuu nuiti ta ɗa telebo nui wɔinzeɠe, kɛlɛ sɔle nuiti ta ɗa ɓaa zɛnvui maazu.

¹¹Ɠimalala nui ɠa ɗa ná-ziiɠaawana vaiti kpein kula kɛlɛma, kɛlɛ ɠima nui ɠa ɗa ɓɔɠɔ zo, é la nɔnɔiti kula kɛlɛma.

¹²Siɛgi zu kundiɠii woilosu da zɛɛ ɓɔɛiti ma, niiti ti botii ɠɛɛzu zeewu, naati pɛ ta ɗa ɠɛ ga wooʋalada nuiti.

¹³Bala nui ta maanɔɠɔ nui, ti ɓɔgɛ faa ɠila ma: Ɠɔoɠɔ GALAGI gaazuʋɛ veeʋɛ ti felegɔ pɛ bɛ, ga ti ɗa wɛlɛ la.

¹⁴Masagi nii é zobobɛlala nuiti ta-lukpɔi ɠaaleʋezu ga gaamai, ná-masadai ɠa ɗa yɛ zea ɠɔ.

¹⁵Kpakɔi ta zelilomai, ta ɗa ɠimalai ve, kɛlɛ zunu loungoi pilɛgai ɓɔɠɔ yeema, toɠa ɗa dee unfe.

¹⁶Siɛgi zu nu ɲɔiti ti mɔinzu la, tɔ koloɠologi zu ɠa ɗa wɔɔlɔ, kɛlɛ telebo nuiti ta ɠɛ ga ta-loobui ma zeelei.

¹⁷Ni ɗa è-loun zunui maaɠolona, é la è yiizoolɛ vaa ɠɛa, kɛlɛ toɠa è yiilɛi ga gola.

¹⁸Siɛgi zu GALA ge la kulakɛlɛma wosu da, nuɓusɛiti ta ɗa eteai ziɛ faazupui zu. Undaanɛɛ nu ɠa ga naama nui, nii naazu, é ɠolozu GALA ná-tɔgi ʋɛ.

¹⁹Nu la ɗa ga botiɠɛ nui maaɠolo ga kpɔɛzuɠulai, mazɔlɔɔ anɛɛ ni toɠa naa ɠaaɠaazu, nii é wosu ma, é la ɠoloa ɲɛgɛlɛin.

²⁰Ɗa nu ɠaana, é ɗa ɓɔɛ, é la ɠigaiziɛzu, nu ɠa ɠito ɠimalala nui ʋa, é leʋe tɔun ba.

²¹Ni nu a botiɠɛ nui laanɛɛna ná-nu niinɛlai zu, toɠa gaaɓela ga kololalai.

²²Ziiɠula nui ɠa ɗa kpɔɛi leʋe, zɔi ziiɠulazu valafala, naa ɠa ɗa tɔ koloɠologiti kɛ.

²³Wasogi ɠa ɗa nui maayei, kɛlɛ ɓɔɠɔmaayeii ɠa ɗa nui wɔɔlɔ.

²⁴Zɔi é yeezeizu unma nui wu, naa ɠa ɗa ɓɔɠɔ nimiza, tɔɔzei é foovooi ɠwɛɛ, é naama nui laalɔɠɔma, nii é ɠɛlɛzu ga é mina ʋa, é ʋa zeele wooi wo.

²⁵Ɗa ɠɛna lua nuiti ba, toɠa ga balii, kɛlɛ zɔi é ɠalivaazu Ɠɔoɠɔ GALAGI ma, naa yiilɛiʋɛ.

²⁶Ma mɔinmɔin ka ná, ti ɗa kpɔbai ɠaiziɛ ta-ɠundiɠii ya, kɛlɛ ɛsɛ maalobo fai ɠa Ɠɔoɠɔ GALAGI ya.