Tɛnɛ Faalaaliiti 28:2-11

²Siɛgi zu kpakagi la zooi zu, kundiɠila ɠaiziɛ nuiti ta ɗa mɔin. Kɛlɛ kundiɠii a zeina, keleɠelegai é ɠala, faiti ta ɗa ziɛ ga pagɔ.

³Zunui é ga bala nui, é maawɔin nuiti maanɔɠɔzu, toɠa ga faa zuɠoloɠolo tonai, é pului loozu.

⁴Niiti ti ɠɛlɛzu GALA ná-tɔgi ʋa, naati ta ɗa faa ɲɔu ɠɛ nuiti maamusɛ, kɛlɛ niiti ti ɠolozu tɔgi ʋɛ, naati ta ɗa laalɛ ti wu.

⁵Niiti ti ɓɔɠɔ veezu faa ɲɔi ya, naati ti la sɔle fai tanɔpɛ gaaɠaazu, kɛlɛ niiti ti ɓɔɠɔ ɠilizu Ɠɔoɠɔ ƓALAGI ʋa, naati ta ɗa faiti pɛ gaaɠa.

⁶Fizɔgɛ nu ɠɛ ga bala nui, è ɗa ziɛ sɔledai zu, è ʋa li ɠɛɛzu ga kpɛtɛ nui, nii siɛ ʋelei ga wooveledai.

⁷Zɔi é ɠolozu GALA ná-tɔgi ʋɛ, doun zunu ɠana keleɠelegai, kɛlɛ zɔi é ʋilɛsu tuʋa ʋele ɲɔu nuiti polu, naa ɠa ɗa ʋa ga unfegi kɛɛɠɛ ʋɔ.

⁸Zɔi é ná-sɔlɔɔgi maamɔinzu ga talama walii, nii dateʋegai, naa ɠa sɔlɔɔgi ɠaalɛɛzu ba naa ʋɛ, nii a maawɔin nuiti maawɔinɠa.

⁹Ni nu a ʋoluavena, ga é mina woilo GALA ná-tɔ gooi ma, ná-GALA falii wɔin ɠa zeɠe GALA ma.

¹⁰Zɔi é telebo nuiti kakasu, é ti ʋilɛ pele ɲɔi ma, toɠa loo zeɠei zu, nii é bɔai. Kɛlɛ niiti ti ziɛzu ga sɔledai, undaanɛɛi ɠa naati tuɠɔ.

¹¹Kpɛtɛ nui ɠeleɠelegɛ ɓɔɠɔ nɔ ɠaazu, kɛlɛ bala nui keleɠelegai, naa ɠa zoo é poluɠula.