Text copied!
CopyCompare
GALA Sɛʋɛi - Tɛnɛ Faalaaliiti - Tɛnɛ Faalaaliiti 27

Tɛnɛ Faalaaliiti 27:10-27

Help us?
Click on verse(s) to share them!
10Mina ɓeteʋe è-wɔɔlaiti ba, ta è-ɠɛɛ bɔɔlaiti. Ni ɗa ɠɛna faaɓaagi zu, mina ɓizɛ, è ʋa li è-ɠɛɛloin ʋɔ bɛ, mazɔlɔɔ siɛ mɔinmɔin su, è-zeiɲɔɠɔi maaɓuɠaai è ʋa, naa vizɔgɛ é leʋe è-ɠɛɛloin ʋa, maaɠoozaai è ʋa.
11Ziɛ ga ɠimalai dòun zunu, zìimaʋɛ laa ɠa ve ga koozunɛɛi, nà zoo gè naati gooɠaaʋote, niiti ti vaazu mà.
12Ɠima nui a faaɓaagi ɠaana, é ɗa ʋa, toɠa ɗa lɔɔɠu. Nui nii é la dɛ faa mɔinmɔin kwɛɛ, naa ɠa ɗa li nɔ ga yiima ʋelei, eyɛsu é suɓoloi ɠɔmɔ.
13Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ.
14Ni nui ta a tuya loona seiɲɔɠɔi ʋɛ, é wooɠula la sobuzobui, toɠa leve bɛ ga foovooi.
15Kpɔɛleʋe anzanui ɠɛɛʋɛ eɠɛ ziɛi, é ʋilɛsu peinpein, maa la leʋezu tonai ʋa voloi.
16Ɗa wɔinna ga è gaaɓɛ, kɛɛʋɛ eɠɛ ɗa ɠɛ fiilɛi zosu ga yeei, ɓaa è gulɔi ʋu yeaʋɛ ga è makɛ.
17Kɔlui ɠa ɗa kɔlui ɠaali, nui ɠigi ɠaazu ɠa ɗa zeɠe ma, seiɲɔɠɔi ná-siɛpolui ʋɔ.
18Zɔi é wɛlɛzu kooleɠoole gului ma, toɠa ma waai ta mi, zɔi é maliɠii makɛsu, toɠa lɛbiya zɔlɔɔ.
19Ʋelei nu ɓɔɠɔ ɠaazuʋɛ ɠaazu la ziɛi wu, ʋele ɠana nu ɠigi a ɗa è-ʋaaɠulabai lɛɛ la.
20Gɔvɛalaazu ta undaaʋili zeɠezaɠai ti zulaa la vega, zekana é la, nuɓusɛi yiimai laa la zeelia pɛ.
21Zanugi ta wali ɠaeiti, ta ɗa ʋɛtɛ abui ɠa, kɛlɛ nui lukpɔi ɠaa ɠa leʋezu, é zoloo daaseigi ma.
22Anɛɛ ni ɗa ɠimalala nui ziɠazu kodai zu ga etei, eɠɛʋelei nu a ɗa kpazii ziɠa la, è la zooga è ʋa ná-titigi ɠula ba.
23Ɗa-loganiiti gilagilagi ɠɛʋelei ɠwɛɛ ga pagɔ, ɠaaɓa gola ɗa-logani ɓulugiti ma.
24Mazɔlɔɔ kpɛtɛi la zeeyɛga ma eyɛsu ɠɔ, masa bɔɔlɔgi la yɛga nu unba yeenɔpɛ.
25Siɛgi zu è tufa vɔɔi leʋezu la, tufa undui ɠa ɗa wuzeɠe, gizeiti ma lufaiti gaa ɠa lɛ ba,
26ɗa-ʋaalagiti maaleɠaiti ta ɠɛ ga è maaɠili zɔɔlaiti, boliiti ta ɠɛ ga ɗa-ɓalagi ɠeya aniiti,
27boliiti ta-ɲiimi ɗɛi maanɛɛʋɛ, é kula ɠɛ ga è-laamianigi, wa ɗa-ʋɛlɛyeɠei, ta ɗa-wotiɠɛ anzanuiti maavaiti.

Read Tɛnɛ Faalaaliiti 27Tɛnɛ Faalaaliiti 27
Compare Tɛnɛ Faalaaliiti 27:10-27Tɛnɛ Faalaaliiti 27:10-27