Tɛnɛ Faalaaliiti 26:9-28

⁹Ɠaingi é zoni dɔɔzo nui ya, ʋele ɠana faalaalii la ɠimalala nui laaʋɛ.

¹⁰Ʋelei kpɛɛin ʋili nui la, é nuɓusɛi kpein maawanazu, pele ɠana naama nui la, nii é ɠimalala nui zeɠezu botiɠɛ vai ma, ɓaa teʋeteʋe nuiti.

¹¹Eɠɛʋelei gilɛi a ɗa ɠale da ma, ná-unpiligi ma, zekana é la ga ɠimalala nui, é ɠalesu ma ná-ɠimalalai ma.

¹²Ɗa nu ɠaana daai da ga gola ɠeleɠelegɛ, ɠimalala nui ná-fai ɠa vizɔ ná-fai ʋa.

¹³Ɲaka nui ɠa ɗa ɠɛ ma: «Zalai ɠa pelei zu, sua ɲɔi ɠa ziɛzu taazuʋɛ pelei zu!»

¹⁴Eɠɛʋelei kpogi a ɗa lati da ná-saniɛlɛiti ga, zekana ɲaka nui a ɗa lati da ná-betei zu.

¹⁵Ɲaka nui ɠa ɗa yeelɔ daami aniɲakai zu, kɛlɛ toɠa ɗa ka ga kpɔlɔ vaa wola ʋɛ, é ʋa dɔ laaʋɛ.

¹⁶Ɲaka nui laaʋɛ ɓɔɠɔ la ga ɠigi ɠa ma, é leʋe zunu lɔfela ʋa, niiti ta zoo ti gooɠaaʋote fe ga keleɠelegi.

¹⁷È ɓɔɠɔ ʋili kpɔɛi ɠa, nii é la loni è ʋa, kɛɛʋɛ eɠɛ gilɛi a yɛ leʋesu, è so goii ʋa.

¹⁸Eɠɛ titi nui é abuleʋegiti pilisu, ta mɛɛinti é ɗa nuiti paa ɓɔɠɔ maaɠoolii zu,

¹⁹pele ɠana zunui naa la, nii é seiɲɔɠɔi yaavazu, naa ʋoluma, é ɠɛ ma: «Soleya vaa nɔ ʋe.»

²⁰Koʋi ʋalagi ɠa ɗa abui za, siɛgi zu nɛ fele ge la ná la, kpɔɛi ɠaa ɠa ɗa yei.

²¹Tiɠii ɠa ɗa abulekai ve, koʋii abui ɠaazo, kpɔɛleʋe zunui ɠa ɗa kpɔɛi ɠaazulɛ.

²²Famai ɠɛɛʋɛ eɠɛ daamiani nɛɛnɛgi, toɠa ɗa yei, eyɛsu é zeeli nui yiimaʋɛ.

²³Wali ɠaei pɛai penɛi maazu, ʋele ɠana kpɔɛ nɛɛnɛgiti ti la, ti nui yiimaʋɛ ma vaa ɲɔiti maalɔɔɠuzu.

²⁴Nui wɔinzeɠemai daavegai, toɠa ɗa maalɔɔɠu ga laawooiti, é ɗa yaavaiti kpɛtɛ ɠoozu.

²⁵Ni a ɠɛna kpɔɛ ʋagɔiti boga, mina la da, mazɔlɔɔ ná-kisiɛiti sulaavegɛ ga faa ɲɔi.

²⁶Keleɠelegɛ gola ná-wɔinzeɠemai lɔɔɠu vai zu, kɛlɛ nuɓusɛi pɛ ge ɓega ga ná-suɲɔi ɠwɛɛ.

²⁷Zɔi a zeɠei wɔ, tɔ ɓɔɠɔ ɠa loo su, zɔi a kɔtui ɠilikilina, toɠa loo tɔ ɓɔɠɔi nɔ ma ʋolu.

²⁸È nui ta maawana ga zɛɛʋɛɛmai, naa ɠa ga è zili la. Wooveledai ma ɓɔɛi wo fai ɠa ɗa ʋa ga faa zuɠoloɠologi.