Tɛnɛ Faalaaliiti 25:4-22

⁴Ni nu a wali ɠaei ma nɔɠɔiti kulana ba, ɠain bo nui ɠa kpɛtɛ ga aniɲaka.

⁵Ni nu a faa ɲɔu ɠɛ nuiti kpɛɛna masagi maaɠoolii zu, toɠa ná-zobogi wɔɔlɔ, a ɠɛna telebodai ɠɛa.

⁶Mina ɓɔɠɔ wɔɔlɔ masagi ɠaazu, mina zei nu wolaiti seizuʋɛ.

⁷Mazɔlɔɔ fizɔgɛ ti ɠɛ ma: «Ʋa è zei unfema zeizuʋɛ,» ti ʋa li è unfesu nu wolaiti gaazu.

⁸Nii ɗa ka, naa mina ɠɛ ga zaɓu, è ʋa suvilɛ ga nu loliga tukpɔɠaaleʋezu. Ni nui naa ɓɔɛ ʋelei a è unfena, leeni ɠa ɗa kɛ?

⁹Ni kpɔɛ a ɠɛna wo yɔɠɔzu wa è-zeiɲɔɠɔi, a gaaɠula ba wa tɔ, kɛlɛ mina taɠili ná-dɔɔɠuzu vaa ɠula kɛlɛzu.

¹⁰Tɔɔzei a mɛnina, toɠa è ʋoomu, è-lɔɠɔi ɠa ɠoloɠolo eyɛsu ɠɔ.

¹¹Kpɔɛi maaɓɛtɛai ga pagɔ, naa wola ʋagɛ, eɠɛ zanu sɔɔlai, maaɠiliai ga wali ɠaei.

¹²Zɔi é woilosu ɠima nui ná-tɛnɛ gooi ma ga pagɔ, toɠa bɛ ga zanu balaɠaegi ɠɛʋele, ta zanu kitei ma ɠɔbu anigi.

¹³Molo leʋe voloi ma liegi zu, ziɛ lɛi ɠa ɗa ɠɛ ga nu yiilɛi ganii. Zekana, gooɠɛɠila keelai a zeɠena ná-siɛi ma, toɠa ɗa maliɠii yiilɛi.

¹⁴Nui é wasosu ga faanɛɛ ɠɛɛ vai, tama é la kɛɛzu, kulaʋɛ ga tonai, nii é maaluai, kɛlɛ é la ʋaazu.

¹⁵Maaɓɔungi ɠa nu a ɗa vɔni da kundiɠii ma, woo nɛɛnɛgi ɓalaa ɠa ɗa nu ɠaei wolo.

¹⁶Ɗa kɔin gulɔi ɠaana, kɔmɔ nɔ ga è-ma liegɔi, mazɔlɔɔ ni ɗa gola ɠɔmɔna, ɗa unpili da.

¹⁷Mina ɗa ga laali è-zeiɲɔɠɔi ma valafala, ni naa laade, toɠa ɓɔlɔ ga ɗa-vai, è wɔinzeɠe ma.

¹⁸Nui a zɛɛ zeele wooi wona, seiɲɔɠɔi laalɔɠɔma, gaawanaʋɛ gulu ɓakɔ wolai ná-doɠai ʋa, ta boɠa zɔkpɔi, ta mɛɛn ɠaazoɓagi.

¹⁹È ɠito yaava nui ʋa, kidaaʋili foloi, kɛɛʋɛ eɠɛ ɗa ɠɛ daami wosu ga è-ɲiigai, é ɲiikpisu, ɓaa è zizi è-ɠɔɠɔi ma, é ɓalizu.

²⁰È guyei loo nui ʋɛ, nii ziizoolɛzu, kɛɛʋɛ eɠɛ ɗa ɠɛ ná-seɠei ɠulazu kɔba kɔɔlɛ voloi, ɓaa è ziɛ ɓodai ʋu sɛɠɛ ɠaei ma.

²¹Ni pului ɠa è zili nui ma, daamianigi ve zea, é mi, ni kpɔɔle wɔin ɠa ma, ziɛi ve zea, é ɓɔɔle.

²²Mazɔlɔɔ abulekaiti kana è puuzu unmaʋɛ, Ɠɔoɠɔ GALAGI ɠa è ɠɔnɔ fe.