Tɛnɛ Faalaaliiti 24:4-21

⁴Faaɠwɛgi ɠa a ɗa buuʋɛti daave ga ani ʋagɔiti ti vizɔgai.

⁵Zunui ɠigi ma, toɠa ga zunui suzeeliai, zɔi faaɠwɛgi zea, ta ɠa ɗa ɓɔ sɛbɛi ʋa.

⁶Mazɔlɔɔ faazeikpasu ʋagɔi ɠa ɗa zoo è kɔɔi ɠɔ la, tɛnɛ bo nuiti ta-mɔin ɠa kizogi a ɗa zɔlɔɔ su.

⁷Ɠimalala nui la zooga é ʋa ɠima vaiti gaaɠa. Naa ɠa é ba, kɛni é ɗa maaɠɛ kpɔ, ta ɠɛna taa vaiti devea.

⁸Zɔi ná-kisiɛi ga é faa ɲɔi ɠɛ, naa laa ɠa ɠɛ ga tɔɠɔ ɠoloɠolo kalamɔin.

⁹Ɠimalala nui ná-kidafaawui ɠa ga kotoi, ɲɛɛɠulasu nui maayoseɠeʋɛ nuɓusɛiti bɛ.

¹⁰Ɗa iɲɔteʋena kpɔlɔi ma ziɛgi zu, è-zɛbɛi maa ɠa ʋɛlɛʋɛlɛ!

¹¹Naati unmɔɔ, niiti ti liizu ga tiye ga ti ti lɔ saai zu, naati kizo, niiti ti liizu ga tiye kazemazu, ga ti ti ʋaa.

¹²Mina ɠɛ ma: «Ee, gè la ɠɛa suɠwɛɛ!» GALA nii é fai pɛ kwɛɛ, nii é ɠɛɛzu è-yiimaʋɛ, naa la zɔɠɔzuɠwɛɛ ɓaa? Ungo, zɔi é è-yɛnvui makɛsu, naa kwɛɛ, toɠa ɛsɛ gilagilagi zala, eɠɛʋelei ná-kɛɛwotiiti ti la.

¹³Dòun zunu, kɔin gulɔi ɠɔmɔ, mazɔlɔɔ kɔin gulɔi ʋagɛ, ma ɲɛmigi ɠa nɛɛ è-laaʋɛ.

¹⁴Ɠitoo su, ga ɠimalai ʋagɛ ɗa-eteai ma vaa ma. Ni ɗa zoona è ziɛ la, ɗa zoo è ɠoozunɛ ʋelela ʋelei, ɗa-ɠitogi la ɠoloɠologa.

¹⁵Mina woya lɔ telebo nui ná-pɛlɛi ma, ga faa ɲɔu, mina seizuʋɛ ɠoloɠolo.

¹⁶Mazɔlɔɔ anɛɛ ni telebo nui loo la ɠa ɠɛɛzu lɔfela, toɠa wuzeɠe, kɛlɛ faa ɲɔu ɠɛ nuiti su ɠa ɗa ɓezeɠele ga maanɔɠɔi.

¹⁷Mina ɠoozunɛ ni è zili nui a loona, ni a lɔɔna kpɔlɔi zu, mina kua wo ga koozunɛɛi.

¹⁸Ɠɔoɠɔ GALAGI ɠa naa ɠa ga wanama vaa, é la mɔ yiiɠaawana ma.

¹⁹Mina yiiɠaawana naati ta-vaa zu, niiti ti faa ɲɔi ɠɛɛzu, mina ɠaazuɠula faa ɲɔu ɠɛ nuiti ba.

²⁰Mazɔlɔɔ kulanuma la naati tuɠɔ, niiti ti faa ɲɔi ɠɛɛzu, ti-yɛnvui ɠa za eɠɛ lanboi.

²¹Dòun zunu, unfe Ɠɔoɠɔ GALAGI ma ta masagi. Mina ʋɔɔkpɔ naati ba, niiti ti pɔ ga ti fai pɛ falibo.