Tɛnɛ Faalaaliiti 23:24-35

²⁴Telebo nui kɛɛɠɛ ɠa ɗa ɠɛ koozunɛɛi zu ɠɔ, undaanɛɛ nu ɠa ga naa, nii é ɠima loun zunui zɔlɔɔsu.

²⁵È-ɠɛɛ ta è-lee ti ɠoozunɛ è ma, naama undaanɛɛi ɠɛ ga anzanui naa nɔnɔ, nii é è zɔlɔɔga eteai zu.

²⁶Dòun zunu, la nɔ̀un da, è sìɛ ʋelei wuuzumɔ.

²⁷Mazɔlɔɔ koloɠolo anzanui ɠa ga zeɠezaɠai suɠoozaai, wɛɛnziɛ anzanui ɠa ga kɔlɔyeɠei sulɔiɗai.

²⁸Toɠa ɗa pele ɓɔungi wo, eɠɛ toosu nu, toɠa ɗa zunu mɔinmɔin kɛ ga wooʋalada nu.

²⁹Ɓɛ ɠa é kpeei loozu ga: «Ee, dèe, màanɔɠɔa»? Ɓɛ ɠa kpɔɛ wafuungiti ti losu ba, maa ɗa wana un ge la ba? Ɓɛ ɠa gaazuɠɛzɛiti kpɔiɗai su?

³⁰Naati, niiti ti lɛbisu dɔɔ ɓɔlezuʋɛ, tɛi ti dɔɔ zupuiti kpɔlezu.

³¹Mina wɛlɛ dɔɔi ʋa pelei ʋa, é nɛsu, é ɗa volo ʋɛɛlɛi zu, é ɗa yei vaa.

³²Toɠa ɗa gaaɓela ga, é nui ɲi eɠɛ kaalii, é nu wo eɠɛ kpokpo ganii ma wanai ba.

³³È-ɠaazuʋɛ ɠa faa ɠiligiti ka, è-ɠigi ta è-laawooiti ta zupu.

³⁴Toɠa ɠɛ è ɠisu, eɠɛ ɗa ɠɛ laani kpoloɗɛi zaamaʋɛ, eɠɛ ɓato zu nui, é zɛlɛni ga ma wului, fiilɛ wolai ɗa ɲiikpi.

³⁵È ɗa ɠɛ ma: «Ta dòɠazu, gaa la wanazu ga ze, ti poolɛni ga kpakɔi, gè la gaaɠaani! Nà wuunsu yeelɛ? Kɛni gè ani zɔlɔɔ, nii nà kpɔle mɔnɔ!»