Tɛnɛ Faalaaliiti 22:4-20

⁴Ɓɔɠɔmaayeii ta Ɠɔoɠɔ GALAGI ɠaazuluabai ma ɠulanumai ɠa ga, kulagaanɛɛzui, ta unfemai, ta sii zuɠoozai.

⁵Yaava ʋelei, ɠaingiti ka ti su, ta baliiti, maanɛai nu maaɠooza ba, ni è-yɛnvui wɔin ɠa è ma.

⁶Doungoi ɠala ga pelei maanɛai é ziɛ la, anɛɛ siɛgi zu é ʋɔlɔzaɠasu da, é la zeɠea ba.

⁷Kpɛtɛ nui ɠa ɗa zei, bala nui unda. Kuye zeɠe nui ɠa ga duɔi, kuye ʋɛɛ nui ya.

⁸Zɔi a telebotalai vaza, toɠa teʋe ga maanɔɠɔi, ná-zobogi ɠa ɠoloɠolo, nii é toomai ɠɛɛzu la.

⁹Nui é nuɓɔɠɔlai ɠɛɛzu seiɲɔɠɔiti bɛ, toɠa tuyai zɔlɔɔ, tɔɔzei ta ɓɔsu ná-daamianigi ma ta bala nui.

¹⁰Ɲɛɛɠulasu nui ɓɛ, kpɔɛi ɠa ɓe, goomaaɠaaliiti ta poomugiti ta ɓe.

¹¹Ni nu wɔinʋɛ é ɠɛ ga masagi nɛɛɲɔɠɔi, kɛni kisiɛ ʋagɔiti ti nɛɛ bɛ, ta nɛɛnɛ kpɔɛiti.

¹²Ɠɔoɠɔ GALAGI ɠa wɛlɛzu faaɠwɛgi ma, kɛlɛ toɠa ɗa yaava nui ná-kisiɛiti supu.

¹³Ɲaka nui ɠɛ: «Zalai ɠa loni eteaʋɛ, é mina lia bàlizu ga pelei zu taa zaamaʋɛ!»

¹⁴Wɛɛnziɛ anzanuiti daaʋɛ ɠa ga zeɠezaɠai suɠoozaai, nui Ɠɔoɠɔ GALAGI yiiɠaawanazu ma, naa ɠa loo su.

¹⁵Ɠimalalai ɠiliʋɛ doungoi yii ʋa, maaɠolo ɓakɔi ɠa maaɠooza ba.

¹⁶Zɔi é bala nui laazuɠɔlizu, é ʋa tɔnɔ sɔlɔɔ ba, ta zɔi é vebɛaniiti feezu kpɛtɛ nui ʋɛ, naati gaaɓelazuʋɛ ɠa ɠɛ ga baladai.

¹⁷Dama, è woilo ga pagɔ ɠima nuiti gooi ma, yiilaalao faaɠwɛgi luɠɔ, gè feezu è ya.

¹⁸Mazɔlɔɔ fizɔgɛ è ti makɛ ɠisu, è ɠɛʋele ɓɛtɛ yeenɔpɛ, è ɗa ti zuɠula.

¹⁹Wɔ̀inʋɛ ga è ɠito Ɠɔoɠɔ GALAGI ʋa, naa ɠa é ba, za, nà è ɠalasu, ɗa ɓalaagi.

²⁰Gè la tɛnɛ gooiti ta kidafaawu vaiti sɛʋɛni è ma, ná zeizu ʋa ɠɛ ga puusaʋagɔ (30), ɓaa?