Tɛnɛ Faalaaliiti 22:15-29

¹⁵Ɠimalalai ɠiliʋɛ doungoi yii ʋa, maaɠolo ɓakɔi ɠa maaɠooza ba.

¹⁶Zɔi é bala nui laazuɠɔlizu, é ʋa tɔnɔ sɔlɔɔ ba, ta zɔi é vebɛaniiti feezu kpɛtɛ nui ʋɛ, naati gaaɓelazuʋɛ ɠa ɠɛ ga baladai.

¹⁷Dama, è woilo ga pagɔ ɠima nuiti gooi ma, yiilaalao faaɠwɛgi luɠɔ, gè feezu è ya.

¹⁸Mazɔlɔɔ fizɔgɛ è ti makɛ ɠisu, è ɠɛʋele ɓɛtɛ yeenɔpɛ, è ɗa ti zuɠula.

¹⁹Wɔ̀inʋɛ ga è ɠito Ɠɔoɠɔ GALAGI ʋa, naa ɠa é ba, za, nà è ɠalasu, ɗa ɓalaagi.

²⁰Gè la tɛnɛ gooiti ta kidafaawu vaiti sɛʋɛni è ma, ná zeizu ʋa ɠɛ ga puusaʋagɔ (30), ɓaa?

²¹Naati ta kala kitei ve è ya, soloogai kitogi ma. Ni nui ta a è leʋena, gaamai ɠaiziɛzu, ɗa zoo è faa gaamaiti bo ma, kisuɠala.

²²Mina lo bala nui ná-zobotalai ma, è ʋa maavo, mina maawɔin nui maanɔɠɔ tukpɔɠaaleʋezuʋɛ.

²³Tɔɔzei Ɠɔoɠɔ GALAGI ɠa ti maalobo, toɠa naama nuiti zɛnvui ɠula ti ya, niiti ti zɔiti zeaɠɔligiti kulazu ti ya.

²⁴Mina ziiɠaawanawana nu zeizei, mina ziiɠula nu ɠɛ ga ziɛpoluɲɔɠɔ,

²⁵è ʋa li ɓɔɠɔ maaɠolozu ga siɛ ʋelei, è ʋa bali la ɓɔɠɔ luɠɔ ɗa-eteai zu.

²⁶Mina ɠɛ naati saama, niiti ta ɠɛ ga zeelagaiti, ziingao faa zu, ta kuye zeɠe vaa zu.

²⁷Mazɔlɔɔ ni ani la è ya, è ʋa sala, ta è ɓɔɠɔ ʋetei ɠula è ya, è laazu ga.

²⁸Mina kwɛpelema ʋɔlɔzaɠagi zeɠe daazu, nii è-mɛmɛwolani ti daani.

²⁹Ni ɗa zunui ta ɠaana ɠigi ma ná-botii zu, toɠa zoo é botii ɠɛ masagiti bɛ, é mina yɛ naati saama, niiti ti la ga sɔɓelama nu.