Tɛnɛ Faalaaliiti 21:11-22

¹¹Maaɠolo ɓakɔi a zeelina waso nui ma, zɔi é la dɛ faa mɔinmɔin kwɛɛ, naa ɓalaa ɠa ɗa ɠi sɔlɔɔ, ɗa ɠima nui ɠalana, toɠa ɗa faaɠwɛgi zɔlɔɔ.

¹²Telebo nui ɠa ɗa ɠida naa kpein bu, nii é ɠɛɛzu faa ɲɔu ɠɛ nuiti ta-ʋɛlɛi wu, siɛgi zu ti lɔɔzu la maanɔɠɔi zu.

¹³Nui nii é la woilosu maawɔin nui ná-kpee wooi ma, tɔ ɓɔɠɔi ɠa kpeei loo, é la gooɠaaʋote sɔlɔɔga.

¹⁴Faanɛɛi é ɠɛɛzu dɔɔɠuzu, naa ɠa ɗa ziiɠaawanai ɠaayei. Lobɛanii é leʋesu dɔɔɠuzu, naa ɠa ɗa ziiɠula golai ɠaayei.

¹⁵Toɠa ga koozunɛ vaa telebo nui ʋɛ, sɔle fai a ɠɛna ɠɛa, kɛlɛ naa ɠa ga nimiza vai faa ɲɔu ɠɛ nui ʋɛ.

¹⁶Nui nii é zeɠezu ɠi pagɔi ma ʋelei ʋa, ná-dooɠo bosuʋɛ ɠa ɠɛɛzu ga gɔvɛiti ta-maaɓɔgi zu.

¹⁷Zɔi ɓɔɠɔyiimai nɛai bɛ, toɠa kpalai ɠwɛɛ, zɔi é ɓɔɠɔ veai dɔɔi ya, ta etea ɠaazuɠulapɔi, é la ɓɛtɛa eyɛsu pɛ.

¹⁸Faa ɲɔu ɠɛ nui ɠa é ga telebo nui unmɔɔ ganii, yaava nui ɠɛ ga sɔle nuiti tɔnɔi.

¹⁹Fizɔgɛ nu zei zooi ta zu naa vɔai, è mina zei kpɔɛleʋe anzanui ɠoba, ziiɠaawanaai.

²⁰Ɠima nui zeizuʋɛ, nu ɠa ɗa ani naavolo ʋagɔiti ka ná, ta gulɔ makɛgaiti, faaɠaaɠaalala nui ɠa ɗa naati suvaza, niiti ti zea.

²¹Zɔi é ɠaaɓaazu, é ɠɛ ga telebo nu, ta wooɠɛɠilada nu, sii zu ɠa ɠooza, toɠa zo ga telebodai ta unfemai.

²²Ɠima nui ɠa laalɛɛna taa wolai wu, nii salaʋusu ɠɛzɛɠɛzɛgiti ti maaɓɛɛzu, é siɠigi loka, nii taai ɠitogai ba.