Tɛnɛ Faalaaliiti 18:11-24

¹¹Kpɛtɛ nui ná-naavoloi ɠa é ga ná-taa wolai, toɠa ɗa ɠigaiziɛ ga toɠa ga siɠigi, nii a zoo tɔun makɛsu.

¹²Siɛgi zu wasogi nui yiimaʋɛ laavesu da, koloɠolo geei zeelia. Aisa è ʋa unfemai zɔlɔɔ, kɛni è zoo ɓɔɠɔmaayeizu.

¹³Zɔi é gooɠaaʋotegi veezu, aisa é ʋa woilo kpɔɛi ma, é wosu, toɠa ná-ɠimalalai ɠula kɛlɛma, é zɔngɔ zɛlɛ ɓɔɠɔ ʋa.

¹⁴Kisiɛ ʋagɔi ɠa zobo fe nui ʋɛ, é ziɛ seeɓɛi wu, kɛlɛ kisiɛ ʋagɔi a valibona ga iɲɔteʋei, ɓɛ ɠa a pu su ʋolu?

¹⁵Keleɠele nui wɔinʋɛ ga é faaɠwɛgi zɔlɔɔ, ɠima nui ɠa ɗa ɠaaɓa ga é woilo kpɔɛiti ma, ta nu ɠala.

¹⁶Faanɛɛi ɠa ɗa peleiti daalao, é nu laazeeli nu wolaiti ma.

¹⁷Nu mɔungi é ɓaazaɠazu, toɠa ɗa ɠɛ eɠɛ toɠa gaamai zea, eyɛsu tukpɔɲɔɠɔi ʋa é gooiti sakpe.

¹⁸Kpakutoomai ɠa ɗa sakpegi ɓe, toɠa ɗa ɓalaa nu wolaiti seɠe unga.

¹⁹Nu zeeli vai ɓaaʋɛ ɠɛɛɠɛloin ma, nii maawanaai, é leʋe taa wolai ʋa, nii siɠigi ma. Kpɔɛi ɠɛɛʋɛ eɠɛ siɠigi laaʋɛ ma zɔɠɔgiti.

²⁰Ɛsɛ ka ɗa daawooiti ma lɔnɔgiti kɔɠɔ, é yiɠo ga tiye, toɠa yiɠo ga niiti, dakɔlɔgiti ti ti veai.

²¹Saai ta zɛnvui ta zoo zɔlɔɔsu nui nɛgi zaɓui zu. Zɔi kpɔɛzuɠulai nɛai bɛ, kɛni é va suɓolo ɠɔmɔ fai wu.

²²Nui a anzai zɔlɔɔna, é undaanɛɛi zɔlɔɔga, faanɛɛ ɠa naa, é sɔlɔɔgai Ɠɔoɠɔ GALAGI ya.

²³Bala nui ɠa ɗa ɓɔɛ ga maanɛɛnɛ wooi, kpɛtɛ nui gooɠaaʋotegi wo ga zeeɠaaɓaai.

²⁴Nui nii bɔɔlai mɔinɗai, ta polu kpɔlɔ vai ma, kɛlɛ nu wɔɔla ɠitei ɠa ɗa ɠili è ʋa, é leʋe è-ɠɛɛloin ʋa.