Tɛnɛ Faalaaliiti 17:14-28

¹⁴Sakpegi lɔɔzei, naa ɠa é ga è ziɛi luɠɔlosuʋɛ laavie, zeɠe ná, aisa kpɔɛi ʋa leʋe.

¹⁵Nii é losu faa ɲɔu ɠɛ nui ʋolu, ta zɔi é telebo nui ʋeelalazu, ti felegɔ pɛ ti maayoseɠeʋɛ Ɠɔoɠɔ GALAGI ʋɛ.

¹⁶Walii a ɠɛna ɠimalala nui ya, leeni ɠa a kɛ la? Toɠa zoo é ɠimalai ɠeya la ɓaa? Kɛlɛ ɠi pagɔ la zea.

¹⁷Bɔɔla nui ɠa ɗa nɛɛbɛi ɠɛ yeenɔpɛ. Ɠɛɛɠɛloin ɠa ɗa kpɔbai ɠɛ, faaɓaagi a ʋaana.

¹⁸Kɛni nui balagai ɠigi ma, naa ɠa a ɗa minazeɠe, é ɓɔɠɔ ɠɛ ga zeelagai, nu ɠiligi ná-kuyei zala vai zu.

¹⁹Nui kpɔɛba vai nɛai bɛ, tɔ koloɠologi nɛɛʋɛ bɛ. Zɔi kibɔɔlɔmai su, naa wɔinʋɛ ga é ɓɔɠɔ ɠoloɠolo.

²⁰Nui yaavai ziimaʋɛ, é la undaanɛ zɔlɔɔga, zɔi é ga nɛ felegi, naa ɠa lɔ nimizai zu.

²¹Zɔi é faaɠaaɠaalala loun zunui zɔlɔɔsu, ziizoolɛi ɠa ɗa ɠɛ ma. Ɠimalala loun zunui, kɛɛɠɛ ɠoozu la ga nɛ.

²²Ziilaai ɠa ga kɛdɛya zaɓu wola, kɛlɛ kiteʋei ɠa ɗa nui zuɲɛgi ɓe.

²³Yaava nui ɠa ɗa lobɛanii zo, ti dɔɔɠu seɠei wu, nii a kɛ é tukpɔi maaʋe.

²⁴Ɠimalai maaɓuɠaʋɛ keleɠele nui ʋa, kɛlɛ ɠimalala nui ɠaazuʋɛ ɠa liizu faiti pɔ, niiti é la zooga é ʋa ti zɔlɔɔ.

²⁵Faaɠaaɠaalala loun zunui kɛɛɠɛ ɠa ɗa ɠɛ ziiɓɔlɔi zu, é ɠɛ ga ziiɠoloɠologi naa ʋɛ, nii é sɔlɔɔga.

²⁶É la zolooni, nu ʋa fuun gani ɠula sɔbalala nui ya, toɠa ga telebotala vaa, è ʋa unfema nui loɠa.

²⁷Nui nii é ziaa faa mɔinmɔin su, naa ɠa ɗa dama, é mina ɓɔɛ ga gola, keleɠele nui ɠa ɗa yeeɠɛɠalai zeɠe, é ɗa ɠisiɛ.

²⁸Ɠimalala nui ɓalaa a ɗa leve ga ɠima nu, ni toɠa zoo maaɠɛsu kpɔ. Zɔi é laaɠulusu, naa ɠa é ga zunui nii keleɠelegai.