Tɛnɛ Faalaaliiti 16:3-26

³Ɗa-vaiti pɛ zɛ Ɠɔoɠɔ GALAGI yeezu, ɗa-vaa zeikpasuiti su ɠa ɓɛtɛ.

⁴Ani kpein kpɛtɛ ungi ɠa ná, Ɠɔoɠɔ GALAGI ʋɛ, anɛɛ faa ɲɔu ɠɛ nuiti, ta ná maanɔɠɔ voloi ʋɛ.

⁵Waso nuiti maayo ge la Ɠɔoɠɔ GALAGI ʋɛ, koleʋɛ ga ti zalalalai la yɛga.

⁶Faaɠaaza golai ɠa ɗa gba ga nuɓɔɠɔlai ta gaamai, Ɠɔoɠɔ GALAGI ɠaazuluabai ʋɔ, nu ɠa ɗa maaɠooza faa ɲɔi ʋa.

⁷Nui ziɛ ʋelei a nɛɛna Ɠɔoɠɔ GALAGI ʋɛ, toɠa ɗa ti yɔɠɔzuɓɛtɛ ta sili nuiti.

⁸Fizɔgɛ ani goi nu sɔlɔɔsu, é zɔlɔɔ telebodai zu, è ʋa sɔlɔɔ golai wo, yaavai zu.

⁹Nui ɠa ɗa faa zeikpasui ɠɛ, kɛlɛ Ɠɔoɠɔ GALAGI ɠa lo kɔɠɔʋolu pɛ.

¹⁰Masagi a ɠɛna ɓɔɛa, daawooi ɠa ga GALA gooi, a ɠɛna tukpɔi ɠaaleʋea, daaʋɛ mina wooveleda ɠɛ.

¹¹Ɠɔoɠɔ GALAGI wɔinʋɛ ga kiloiti ti laazeeliai, toɠa devezu, ʋelei kɔɠɔ ganiiti maanɛai ti ɠɛ la.

¹²Faa ɲɔu ɠɛɛ vai maayoseɠeʋɛ masagiti bɛ, mazɔlɔɔ telebodai ɠɛai ɠa a ɗa ná-zobogi maawui.

¹³Masagi wɔinʋɛ ga naati, niiti ti-laawooiti sɔlegai, naati nɛɛʋɛ bɛ, niiti ti ɓɔɛzu ga gaamai.

¹⁴Siɛgi zu masagi yiiɠaawanazu la, ná-ziiɠulagi ɠɛɛʋɛ eɠɛ saa ɠeelai, kɛlɛ ɠima nui ɠa zoo é gaaɓɛ.

¹⁵Siɛgi zu masagi ɠaazulo pelei ʋasu da, naa ɠa é ga zɛnvui, ná-nuɓɔɠɔlai ɠɛɛʋɛ eɠɛ foɠo ɠulazu lonaɓiingi.

¹⁶Ɠimalai zɔlɔɔ fai vizɔgɛ zanu kitei ɠaalɛ ba vai ʋa, keleɠelegi maaɓɔgai leʋegɛ walii ʋa!

¹⁷Sɔle nuiti ta-ʋelei ɠa é ga, è ʋoluave faa ɲɔi ʋa, zɔi é ɠaaɓaazu siɛ ʋelei ma, naa ɠa zɛnvui ɠizosu.

¹⁸Wasogi ɠa a ɗa ʋa ga nu ɠoloɠolo fai, kibɔɔlɔmai ɠa a ɗa ʋa ga tooi.

¹⁹Fizɔgɛ nu ɓɔɠɔmaayei, wa ɓɔɠɔmaayei nuiti, wo ʋa li ɓɔsu kɔɔzoganii ma, wa waso nuiti.

²⁰Zɔi é ɠidaazu kala gooiti bu, naa ɠa undaanɛɛi zɔlɔɔ, undaanɛɛ nu ɠa ga naama nui, nii é ɠitosu Ɠɔoɠɔ GALAGI ʋa.

²¹Zɔi é ga ɠima nui ziimaʋɛ, naa ɠa ta ɗa ɠɛ ma, keleɠele nui, kpɔɛ nɛɛnɛgi ɠa a ɗa pilɛ sɔlɔɔ.

²²Ɠimalai ɠa ɗa zɛnvui ve naati zea, niiti ti ziɛzu la, ɠimalala nuiti salai ɠa ga ɠimalalai.

²³Ni ɠimalai ɠa nui yiimaʋɛ, toɠa ɗa ɓɔɛ ga kidafaawui, ná-yɛpɛi é bosu, naa ɠa ɗa faa ʋaa mɛni nuiti ma.

²⁴Kpɔɛ ʋagɔiti kɛɛʋɛ eɠɛ kɔin gulɔi, nii nɛai zɛnvui ʋɛ, pagai ga kɛdɛ ganii kpusɛi vaa zu.

²⁵Ta ɠa ná, siɛ ʋelei zɔlegai gaazu, kɛlɛ gaaɓelazuʋɛ ɠa ga saa ʋelei.

²⁶Pului ɠa ɗa ɠɛ ga botiɠɛ nui ná-kpɔbai, daaʋɛ ɠa ɗa di botiɠɛ vai ma.