Tɛnɛ Faalaaliiti 16:16-33

¹⁶Ɠimalai zɔlɔɔ fai vizɔgɛ zanu kitei ɠaalɛ ba vai ʋa, keleɠelegi maaɓɔgai leʋegɛ walii ʋa!

¹⁷Sɔle nuiti ta-ʋelei ɠa é ga, è ʋoluave faa ɲɔi ʋa, zɔi é ɠaaɓaazu siɛ ʋelei ma, naa ɠa zɛnvui ɠizosu.

¹⁸Wasogi ɠa a ɗa ʋa ga nu ɠoloɠolo fai, kibɔɔlɔmai ɠa a ɗa ʋa ga tooi.

¹⁹Fizɔgɛ nu ɓɔɠɔmaayei, wa ɓɔɠɔmaayei nuiti, wo ʋa li ɓɔsu kɔɔzoganii ma, wa waso nuiti.

²⁰Zɔi é ɠidaazu kala gooiti bu, naa ɠa undaanɛɛi zɔlɔɔ, undaanɛɛ nu ɠa ga naama nui, nii é ɠitosu Ɠɔoɠɔ GALAGI ʋa.

²¹Zɔi é ga ɠima nui ziimaʋɛ, naa ɠa ta ɗa ɠɛ ma, keleɠele nui, kpɔɛ nɛɛnɛgi ɠa a ɗa pilɛ sɔlɔɔ.

²²Ɠimalai ɠa ɗa zɛnvui ve naati zea, niiti ti ziɛzu la, ɠimalala nuiti salai ɠa ga ɠimalalai.

²³Ni ɠimalai ɠa nui yiimaʋɛ, toɠa ɗa ɓɔɛ ga kidafaawui, ná-yɛpɛi é bosu, naa ɠa ɗa faa ʋaa mɛni nuiti ma.

²⁴Kpɔɛ ʋagɔiti kɛɛʋɛ eɠɛ kɔin gulɔi, nii nɛai zɛnvui ʋɛ, pagai ga kɛdɛ ganii kpusɛi vaa zu.

²⁵Ta ɠa ná, siɛ ʋelei zɔlegai gaazu, kɛlɛ gaaɓelazuʋɛ ɠa ga saa ʋelei.

²⁶Pului ɠa ɗa ɠɛ ga botiɠɛ nui ná-kpɔbai, daaʋɛ ɠa ɗa di botiɠɛ vai ma.

²⁷Nu ɲakai ɠa ɗa faa ɲɔi ɠɛʋele ɓɛtɛ, daawooiti kɛɛʋɛ eɠɛ abulekai, é galai wosu.

²⁸Yaava nui ɠa ɗa kpɔɛiti teʋe, zɔɠɔzuziɛ nui ɠa ɗa bɔɔla nuiti bali ma.

²⁹Suɲɔu nui ɠa ɗa seiɲɔɠɔi yaava, é naa ʋilɛ pelei ʋa, nii ɲɔuɗai.

³⁰Zɔi é ɠaazuʋɛɛzu ma ga é ɠisiɛ yaava ɠɛɛ vaiti su, é lakɔlɔgiti pu bu, naa ɓega ga faa ɲɔi ɠɛ.

³¹Undeɠa ɠolegiti ta ga lɛbiya wɔɔlɔgi, ta ɗa zɔlɔɔ sɔledai zu.

³²Zɔi zii la ɠula fala, naa vizɔgɛ kɔɔɠuluɓai ʋa, nui é ɓɔɠɔ zosu, naa vizɔgɛ zɔi ʋa, é taa wolai zosu.

³³Ta ɗa kpakutoomai ɠɛ ga, ti ʋelela ʋele vaiti kwɛɛ, kɛlɛ Ɠɔoɠɔ GALAGI ɠa a ɗa deve ɠaaɓelagi wo.