Tɛnɛ Faalaaliiti 11:21-30

²¹Gaamazu, faa ɲɔu ɠɛ nuiti salalalai la yɛga, kɛlɛ telebo nuiti ti-mavofodaiti ta ɠizo.

²²Anzanui nii pagai, kɛlɛ balagai ɠigi ma, kɛɛʋɛ eɠɛ zanu balaɠaegi piligai boigi zokpai ʋa.

²³Telebo nuiti wɔinma vaa ɠila kpegi nɔ ɠa faa ʋagɔi. Nii nɔ faa ɲɔu ɠɛ nuiti ta zoo ti ɠito ba, naa ɠa nɔ ga GALA ná-ziiɠaawanai.

²⁴Tanigaa ta ɗa faanɛɛi ɠɛ gola, tama ti ɗa wola ɓɛtɛ. Tanigaa ma ti ɗa ɠikpa naavoloi ma gola, tama ti ɗa ʋala.

²⁵Faanɛɛ ɠɛ nui ɠa ɗa sɔlɔɔgi wo gola, zɔi a nu ɠɔ ga kpɔɔleɗɛi, tɔ ɓalaa ka kpɔɔleɗɛi zɔlɔɔ.

²⁶Nuɓusɛiti ta ɗa molo makɛ nui voovo, zɔi é ɠɛɛzu, é ʋa pɔdi ga daaɓaai, kɛlɛ ta ɗa tuya loo naa ʋɛ, nii é liizu la ga é pɔdi.

²⁷Zɔi é faa ʋagɔi ɠɛɛ vai ɠaiziɛzu, naa ɠa ɗa undaanɛɛi zɔlɔɔ, kɛlɛ zɔi é faa ɲɔi ɠaiziɛzu, faa ɲɔi ɠa ɗa zeeli naa ma.

²⁸Zɔi a ʋoluzei ná-naavoloi ʋa, naa ɠa loo bu, kɛlɛ telebo nuiti gaa ɠa wɔɔlɔ eɠɛ gulu wola, nii gaalaagi mɔinɗai.

²⁹Zɔi a gooɠaavazagi lɔɔna ná-pɛlɛyeɠei wu, toɠa sulɔnɔgi zɔlɔɔ ga fiilɛ wolai, faaɠaaɠaalala nui ɠa ɠɛ ga ɠima nui ná-duɔi.

³⁰Telebo nui ná-kɛɛwotiiti ta ga zɛnvu wului, ɠima nui ɠa ɗa nui taɠiligaa ʋilɛ pele ʋa.