Túramuri̱ 12:13-19

¹³Tura jeá a̱a̱ wáitin tuntuimiayi, waya̱taj tusa. Túmakui nuwa̱ uchich, ni naari̱ Ruti, yákit tusa iyumiayi.

¹⁴Tura jeari, Pitru chichame̱n anturak ti shiir enentáimsamiayi. Túmak wáitin urattsuk ikiuki, init matsatainian werí “Pítiur taa wáitiniam wajaawai” tímiayi.

¹⁵Tutai “Wáurtsumek” tiarmiayi. Tútaisha núwa̱ka “Atsá nekasaiti” tímiayi. Tútaisha nú arant “Níichuiti. Antsu ni wakaní̱ túratsuash” tiarmiayi.

¹⁶Tu chichainiai̱ṉ Pítruka tuke tuntuí wajamiayi. Tura wáitin uraj tukamá Pitrun wáinkiar ashamkarmiayi.

¹⁷Ashamak chichainiakui Pítiur, uweje̱ takuí itiatmamtikiarmiayi. Tura nuyá Uunt Yus sepunmaya̱n uwemtikramun ujakmiayi. Tura “Ju̱ chicham Jakupu tura chíkich Yus-shuarsha ujaktarum” tímiayi. Nuna ti̱ iniais jiinki arant wémiayi.

¹⁸Kashin tsawa̱r suntarsha Pitrun atsá wáinkiar “Chuwa urukakua meṉkaka. Áya̱wa̱ urukattajia” tiarmiayi. Pítiur túrunamun nékachu ásar nuna tiarmiayi.

¹⁹Túrunamtai Erutis chichaak Pítiur e̱a̱ktarum tusa akupkarmiayi, túrasha wáinkiacharmiayi. Túrunamtai Erutis suntaran untsukar, Pítrun íisarmia nuna aniasarmiayi “¿Pítiur itiura meṉkakama?” tímiayi. Niisha áimiainiachkui, nu suntaran mantámnatí tusa akupkamiayi. Erutissha Tirunmaya̱ tura Setúnmaya̱ áentsja̱i̱sha nemasnaikiarmiayi. Túmayataṉ Jutía nuṉkan ikiuki Sesaria péprunam pujustaj tusa Erutis wémiayi. Sesaria péprusha Tiru péprunam tíjiu̱chiiti. Setúnmaya̱ aents Tirunmaya̱ áentsja̱i̱ Erutisa nuṉke̱yan yurumkan súmainia ásar, Erutisja̱i̱ nawamnaikiatniun wakeriarmiayi. Tuma asamtai métekrak enentáimsar, Erutisa takarniuri̱ peṉkeri̱, ni naari̱ Parastu, niiji̱a̱i̱ emka amikmawar nuyá Erutisan weriar shiir matsamsatniun seawarmiayi.