Suuki 2:3-12

³«N xanuntenyi luxi nɛ alɔ mangoe bili wondi kui. A fan sɛgɛtalae birin bɛ. N bara wa lufe a xa niini bun ma, a xa fe rafan n ma alɔ mangoe rafanma mixi ma ki naxɛ.

⁴A bara n xanin a xɔnyi, a xa xanunteya bara findi ɲɛlɛxinyi ra n bɛ.»

⁵«Donse ɲɔxunmɛ so n yi, n ki mangoe, barima xanunteya naxan na n bɔɲɛ kui, a bara n sɛnbɛ ba n yi ra.

⁶N xunyi na n xanuntenyi bɛlɛxɛ, a na n mafurukufe a yirefanyi ra.»

⁷«Darisalamu ginɛdimɛe, n bara wo mayandi, tɔɔkɛ nun xeli xili ra naxee na wula i, wo naxa xanunteya raxunu, wo naxa a rakeli, beenu a wama a xɔn ma tɛmui naxɛ.»

⁸«N xanuntenyi xui na a ra, a na fafe a gi ra geyae fari.

⁹A gima alɔ tɔɔkɛ, a tuganma alɔ xeli. A na be won ma tɛtɛ xanbi ra, a na be matofe wundɛri ra.

¹⁰A naxa a fala n bɛ, ‹N xanuntenyi tofanyi, keli, i xa fa,

¹¹barima ɲɛmɛ tɛmui bara dangi, tunɛ mu birama sɔnɔn.

¹²Sansi na bogife daaxa, ɲɛlɛxin waxati bara a li, xɔnie na e xui raminife won ma bɔxi ma.