Sua Tutŋana 8:4-17

⁴“O niom iwal biibi ki toono, nio iŋgi aŋboboobo yom be kamar ma keleŋ sua tio ti.

⁵Niom wal ta leyom ŋgar biibi som na, kamar tio. Naso aŋuulu yom be kakam kat ŋgar. Niom wal kankaanaŋoyom ta kozorzooro na, kamar tio bekena aŋuulu yom ma kikilaala ŋgar iŋgoi ta ambai ma ilip na.

⁶Keleŋ sua tio ti. Pa nio leŋ ŋgar ambaimbaiŋan boozomen be aŋso yom pa. Sua ta iwedet pa kwoŋ na, indeŋdeeŋe men.

⁷Sua sananŋana sa irao ipet pa kwoŋ na som. Som kat. Sua tio, ina ŋonoono men.

⁸Sua boozomen ta iwedet pa kwoŋ na, sa ipaŋoobo som. Indeŋdeeŋe men.

⁹Zin wal ta ŋgar kizin ipet kek na, tikilaala kembei sua tio ta boozomen izal men. Zin wal ta len ŋgar na, tiute: Sua tio, ina ambai men.

¹⁰Kakam ŋgar pa pat silba pepe. Kakan la sua tio pazalŋana. Pa ina ilip pa pat silba. Mi ŋgar ambaiŋana tabe aŋso yom pa i, ta kembena. Ilip pa gol ta ambaimbaiŋan kat. Tana kakam ma iwe leyom.

¹¹Pa ŋgar ambaiŋana, ina ilip pa pat milmilŋan ta kan kadon bibip i. Koroŋ boozomen ta leleyom pa i, sa irao iuulu yom kembei ŋgar ambaiŋana na som.”

¹²Ŋgar ambaiŋana izzo ta kembei: “Nio aŋbotmbot raama ŋgar ta iurur ŋonoono. Pa aŋkam kat ŋgar kek. Tana aŋrao be aŋpaute yom pa so mbulu tabe kakam i.

¹³Tomtom ta so imototo Yooba mi ileŋleŋ la kalŋaana, nako iurur koi pa mbulu sananŋana. Mi nio ta kembena. Mbulu ki pakurŋana mi repiiliŋana, ramaki mbulu sananŋan mi sua pakamkaamŋan ta boozomen na, leleŋ pa ri sa som kat.

¹⁴Nio aŋrao be aŋso yom pa ŋgar ambaiŋana, mi aŋuulu uraata tiom ma iur ŋonoono. Pa leŋ ŋgar ambaiŋana mi mburoŋ biibi.

¹⁵Nio aŋuluulu zin king mi wal peeze kan be tikam kat peeze, mibe tiur tutu ndeeŋeŋan men pizin tomtom.

¹⁶Nio aŋuluulu zin bibip be timboro kat zin tomtom, mibe tiurpe pataŋana kizin ma indeeŋe men.

¹⁷Zin wal ta so tiurur lelen pio, na nio aŋurur leleŋ pizin. Mi zin wal ta so tikam kinkiini be tiru yo, nako tindeeŋe yo.