Sua Tutŋana 7:8-18

⁸Iwwa pa zaala ma ila, mi igarau ruumu ki moori ta.

⁹Ila ipet ruumu tana na, zoŋ isula mi zugut isu.

¹⁰To moori tana izeebi pa mburu kembei ta moori zaala lwoono kan tiurur na, mi ipaŋuru i ma imar. Imar raama ŋgar turkeŋana ta.

¹¹Moori tana mbuleene izzu ruumu som. Gorgori iwwa lene mi ipaŋarairai kalŋaana.

¹²Mi irru zin tomooto su nol muriini, mi ikewe su zaala lwoono be izaŋzaaŋa zin.

¹³Tana ire naŋgaŋ tina, to loŋa men mi isou i, mi ikan kwoono. Mi ka miaŋ ri sa som. Iso kat pini ma iso:

¹⁴“Ai, nio ti, muŋgu aŋbuk sua pa Anutu be aŋkam patoronŋana pini. Mi koozi aŋkam patoronŋana tana, mi buzur ka lwoono imbotmbot ruumu tio be takan.

¹⁵Tana aŋyooto pa ruumu ma aŋmar be aŋru u tau. Mi iŋgi aŋdeeŋu kek.

¹⁶Leŋ. Nio aŋurpe mbalia tio, mi aŋwar mburu ta kan mos ambaimbaiŋan na ise muriŋ. Mburu tana imbot taa Aikuptu mi imar.

¹⁷Mi aŋliŋ koroŋ pakan ta kuzin ambaimbaiŋan na ise ma ambai leen!

¹⁸Tana mar ma ituru tekeene. Ko menmeen ti mi takamam ma ila irao zoŋ ise!